Qirgʻiziston Islom diniga qarshi kurashda navbatdagi qadamini tashladi
Hukumat matbuot xizmatining xabar berishicha, Qirgʻizistonda diniy ekstremizm va terrorizmga qarshi kurash boʻyicha davlat dasturi ishlab chiqiladi.
Xabarga koʻra, bosh vazir oʻrinbosari Jenish Razoqov dasturni ishlab chiqish masalasi boʻyicha ishchi yigʻilish oʻtkazgan. Razoqovning qayd etishicha, diniy ekstremizm va terrorizm tahdidi olamiy koʻrinish kasb etib borayotgani sababli davlat dasturi muhim ahamiyatga ega.
Qayd qilinishicha, asosiy eʼtiborni jamiyatda, ayniqsa, yoshlar orasida diniy ekstremizm oldini olishga qaratish lozim.
Jenish Razoqovning fikricha, ekstremizm va terrorchilik faoliyatlarni aniqlash uchun davlat idoralari, shu jumladan, huquqni muhofaza qilish va mahalliy oʻzini oʻzi boshqarish organlari oʻrtasida hamkorlik darajasini oshirish va xavfsizlikni mustaxkamlash choralarini kuchaytirish zarur.
Yigʻilish soʻngida Jenish Razoqov diniy ekstremizm va terrorizmga qarshi kurash boʻyicha davlat dasturini ishlab chiquvchi idoralararo ishchi guruhini tashkil etish vazifasini yukladi.
Turkiston:
Qirgʻiziston hukumati ham qoʻshnilari izidan borib Islom va musulmonlarga qarshi olib borayotgan kurashini bosqichma bosqich kuchaytirib bormoqda.
Dastlab, 2014- yili Atambayev tashabbusi, Mudofaa kengashi qarori bilan diniy soha boʻyicha davlat siyosatini 2020- yilga qadar moʻljallangan yangi Kontseptsiyasini ishlab chiqishga kirishilgan edi. Natijada din ishlari boʻyicha davlat komissiyasi, Ichki ishlar vazirligi va Davlat milliy xavfsizlik qoʻmitasi boʻlinmalari diniy tuzilmalari faoliyatlarini analiz qilish, qonun hujjatlariga qoʻshimcha va oʻzgartirishlar kiritish boʻyicha takliflar ishlab chiqishdi.
Ular olib borgan analizlar ortidan Qirgʻizistonda faoliyat olib borayotgan Tabligʻ jamoasini taqiqlash masalasi koʻtarildi. Qirgʻiziston musulmonlari bu masalaga jiddiy qarshilik bildirishlari natijasida hukumat bu ishni toʻxtatishga majbur boʻldi. Ammo kurashdan toʻxtamadi.
2016 yoz oyida prezident Almazbek Atambayev “Ekstremistik faoliyatga qarshi kurash toʻgʻrisida”gi qonunni imzoladi. Natijada qamoqxonalarda nohaq ushlab turilgan musulmonlarni boshqa mahbuslardan ajratish, musulmonlar uchun maxsus yopiq turdagi qamoqxona qurish harakati boshlandi. Garchi oʻzlari qabul qilgan qonunga muvofiq mahbusning jazo turini oʻzgartirish faqat sud hukmi bilan amalga oshirilishi mumkin boʻlsada, qonunga xilof ravishda musulmonlarni yopiq turdagi qamoqxonalarga oʻtkazish boshlandi. Ayni vaqtda diniy eʼtiqodi uchun qamalgan 30ga yaqin musulmon yopiq turdagi qamoqxonaga koʻchirib oʻtkazildi.
Bugunga kelib esa Islom va musulmonlarga qarshi olib borilayotgan kurashda hukumat navbatdagi qadamini tashladi. Rasmiy hukumat terrorizm va ekstremizmga qarshi kurash niqobi ostida Islom dini, uning qadriyatlari va koʻrinishlariga qarshi kurash olib borayotgani kundek ravshan. Endilikda hukumat bu kurashga mahalliy oʻzini oʻzi boshqarish organlari (qishloq va mahalla qoʻmitalari)ni ham jalb qilishga intilmoqda. Bu uslub esa Oʻzbekistonda uzoq yillardan beri tatbiq etib kelinyapti. Endi Qirgʻiziston hukumati ham oʻzbek rejimi kabi qishloq va mahallalarda posbonlar guruhini tashkil etish orqali xalqning ichidan chaqimchi va sotqinlarni paydo qilish yoʻlida qadam tashladi. Jenish Razoqov buyrigʻi bilan tashkil etiladigan ishchi guruh ayni shu ishni roʻyobga chiqarish boʻyicha ish olib boradi.
