Rossiya Erdugʻonning bayonotiga eʼtiroz bildirdi
Turkiya prezidenti Rajab Toyyib Erdogʻan turk qoʻshinlarining Suriyaga kirish sababi Suriya Prezidenti Bashar Asadning hukmdorligiga chek qoʻyish ekanligi haqida bayonot berganidan soʻng Rossiyadan birin ketin javob kela boshladi. Prezident Erdogʻan oʻtgan kuni ishtirok etgan yigʻilishda BMT Xavfsizlik Kengashi Suriya borasida bir qadam ham tashlamaganligini aytib, “Biz Sabr, sabr dedik, oxiri chiday olmadik va Suriya ozod armiyasi bilan birgalikda Suriyaga kirishga majbur boʻldik. Nima uchun kirdik?… Davlat terrorini amalga oshirgan zolim Asadning hukmdorligiga chek qoʻyish uchun u yerga kirdik. Boshqa narsa uchun emas”, degan edi.
Erdogʻanning mazkur bayonoti haqida Jurnalistlarga intervyu bergan Kreml matbuot kotibi Dmitriy Peskov “jiddiy, kutilmagan bayonot”, deya baholadi.
“Turkiyaning bayonotlari biz uchun “syurpriz” boʻldi. Bu juda jiddiy bayonotdir. Bu avvalgi bayonotlarga ham, mavjud vaziyatga nisbatan oʻrtamizdagi kelishuvga ham ziddir. Turk hamkorlarimiz bu bayonotni bizga izohlab beradi degan umiddamiz”, dedi Peskov.
Rossiya Tashqi ishlar vazirligi matbuot kotibi Mariya Zaharova esa haftalik matbuot anjumanida “Biz Suriya inqirozini hal etish uchun ogʻzaki soʻzlarga emas, yuqori darajadagi uchrashuvlar davomida erishilgan va imzolangan xalqaro shartnomalarga qaraymiz”, deya Erdogʻanning yuqoridagi bayonotini eʼtiborga olmasligini bildirdi.
Rossiya Tashqi ishlar vaziri oʻrinbosari Mixail Bogdanov Erdogʻanning bu soʻzlari Rossiya va Turkiya oʻrtasida avval erishilgan bitimlarga zid ekanligini bildirar ekan, Vena va Lozannada ham qanday bitimlarga imzo chekilganligini Erdugʻonga eslatib oʻtdi.
“Bu bayonotlar ilgari Rossiya va Turkiya oʻrtasida erishilgan barcha shartnomalarga ziddir. Birinchidan 2254 sonli qarorga, 2268 sonli qarorga Vena formatida va Lozanna formatida qabul qilingan qarorlarga ziddir. Turkiya ham bu formatlarda biz bilan bir safdan oʻrin olgan. Agar Erdogʻan urush istasa, albatta bu kelishilgan shartnomalarga toʻgʻri kelmaydi”, dedi Bogdanov.
Rossiya parlamentining quyi palatasi Tashqi ishlar qoʻmitasi raisi va mudofaa qoʻmitasing aʼzosi Aleksey Pushkov Erdogʻanning bu soʻzlarini amalga oshirish mumkin boʻlmagan, faqat siyosiy iboralardan iborat eganligini bildirdi.
