Suriyadagi vaziyat Rossiyaning xavotirini kuchaytirmoqda
Suriyadagi keskinlik Rossiyani xavotirga sola boshladi. Bu haqida Rossiya Tashqi ishlar vaziri Sergey Lavrov Suriya Tashqi ishlar vaziri Valid Muallim va Eron tashqi ishlar vaziri Javod Zarif bilan Moskvada uchrashuv oʻtkazgandan soʻng kameralar qarshisida bergan intervьyusida maʼlum qildi. Lavrovga koʻra, kech boʻlmasidan, “terroristlarga” (mujohidlarga) qarshi kurash uchun kuchliroq harakatga oʻtish lozim.
“Terroristlarni (mujohidlarni) toʻxtatish uchun harakatlarimizni kengaytirishimiz lozim. Boshqa yoʻlimiz yoʻq. Aks holda bu jangda faqatgina Suriyada emas, balki butun Yaqin Sharqda magʻlubiyat alamini tortish xavfi ostida qolamiz”, deya qoʻshimcha qildi Rossiya tashqi ishlar vaziri.
Lavrovning bu bayonoti muxolifatchi kuchlar Halab qamalini olib tashlan uchun harakatga oʻtishlari ortidan yangradi. Sentyabr oyidan buyon taxminan 275 ming kishi Asad kuchlari tomonidan qamal ostiga olingan holda qolmoqda.
Shuningdek, Sergey Lavrov Suriyaning Halab shahrida Jabhatun nusra kabi “terrorchi” guruhlar bilan aloqalarini uzmagan barcha muxolif guruhlarni ham nishonga olishini maʼlum qildi. Moskvaning taʼkidlashicha, Amerika Qoʻshma Shtatlari Rossiyaning bu harakatlarini qoʻllab quvvatlaydi.
Soʻngi olingan xabarlarda aytilishicha, Rossiya Qora dengizdagi harbiy kuchlarini ham Suriyaga sfarbar qilgan. Ayni paytda Qora dengiz flotiga qarashli “Smetlivy” nomli kema Qrimdan Suriyaga yoʻl olgani aytilmoqda. Rus manbalariga koʻra, kemada polkovnik Dmitriy Uskov boshchiligida terrorizmga qarshi kurash guruhi mavjud.
