Toshkentda IHT TIVKning 43-sessiyasi ish boshladi
Oʻzbekiston tashqi ishlar vazirligining xabar qilishicha,18 oktyabr kuni Toshkent shahrida Islom hamkorlik tashkiloti Tashqi ishlar vazirlari kengashining 43-sessiyasi oʻz ishini boshladi.
Unda 50dan ortiq aʼzo davlatlar, kuzatuvchi mamlakatlar hamda qator xalqaro va mintaqaviy tashkilotlar vakillari ishtirok etadi.
Ochilayotgan Toshkent sessiyasi IHT TIVKning 2017 yilda boʻlib oʻtadigan navbatdagi majlisiga qadar Oʻzbekiston Respublikasi raisligining rasman boshlanishi boʻladi.
Oʻzbekiston raisligining shiori – “Taʼlim va maʼrifat – tinchlik va bunyodkorlik yoʻli”.
Oʻzbekiston prezidenti vazifasini bajaruvchi Shavkat Mirziyoyev kengashning ochilish marosimida ishtirok etdi.
Tashqi ishlar vazirligi matbuot xizmati xabariga koʻra, Mirziyoyev oʻz chiqishida Oʻzbekistonning Islom hamkorlik tashkilotidagi raisligi davridagi ustuvor yoʻnalishlar haqida batafsil tanishtirib oʻtdi.
