Portugaliyaning sobiq bosh vaziri BMT Bosh kotibligiga tasdiqlandi
BMT Bosh assambleyasi payshanba kuni Portugaliyaning sobiq bosh vaziri Antoniu Guterrishni xalqaro tashkilot bosh kotibligiga tasdiqladi.
Yigʻilishda portugaliyalik siyosatchining 2017 yil 1 yanvaridan BMT rahbari etib tayinlanishi haqidagi rezolyutsiya koʻrib chiqildi. Guterrish ushbu lavozimda 2021 yilning 31 dekabriga qadar faoliyat olib boradi.
“Men Antoniu Guterrishni BMT Bosh kotibi sifatida 2017 yil 1 yanvaridan 2021 yilning 31 dekbriga qadar tayinlanganini eʼlon qilaman”, – deya eʼlon qildi BMT Bosh assambleyasi raisi Pitem Tomson.
Guterrish payshanba kungi chiqishida dunyodagi mojarolarni hal etishni oʻzining bosh maqsadlaridan biri ekanligini taʼkidlagan.
U yoshligida litseyda oʻqib yurgan vaqtlarida tarixga juda qiziqqanini aytib oʻtar ekan, “Men oʻshanda avvalgi urushlarda gʻoliblar boʻlganligini bildim. Bugun bunday emas, biz faqat yutqazganlarni koʻryapmiz, urushning oʻzi esa tugamas ekan. Bizning jamoaviy vazifamiz – bunday holatga yakun yasash”, – dedi Antoniu Guterrish.
