Rossiya Suriyaning Tartus shahrida harbiy-dengiz bazasini tashkil etadi
Rossiya mudofaa vaziri oʻrinbosari, stats-sekretar Nikolay Pankovning maʼlum qilishicha, Suriyaning Tartus shahrida Rossiya harbiy-dengiz kuchlarining doimiy bazasi tashkil etiladi.
“Suriya hududida, Tartusda doimiy asosda harbiy-dengiz bazamiz boʻladi. Ayni vaqtda shu haqdagi hujjat tayyorlanmoqda. Uni jiddiy muhokama jarayonidan oʻtkazishadi… va biz umid qilamizki, tez orada hujjat ratifikatsiya qilinadi”,- degan Pankov.
Suriyaning Tartus shahrida Rossiya floti boʻlishini taʼminlash boʻyicha sharoitlarni tayyorlash ishlari 1977 yildayoq boshlangan. Ayni vaqtda Tartusdagi punkt Rossiyaning Oʻrta Yer dengizi hududidagi yagona tayanch nuqtasi hisoblanadi.
Oʻtgan haftada Rossiya mudofaa vazirligi Suriyaga C-300 tizimi yuborilganini tasdiqlagandi. Ushbu majmua Suriyaning Tartus shahrida joylashgan harbiy-dengiz bazasi va sohil hududidagi Rossiya harbiy-dengiz floti kemalarini havodan himoya qilish uchun moʻljallangan.
