Rossiya Kaliningradga raketa majmualari tashladi
Rossiya mudofaa vazirligi Kaliningrad yaqiniga “Iskander-M” raketa majmualari tashlanganini tasdiqladi. Vazirlikning rasmiy vakili general-mayor Igor Konashenkovning aytishicha, “raketa qoʻshinlarining boʻlinmalari jangovar tayyorgarchilik doirasida Kaliningrad viloyatiga tashlangan va kelgusida ham tashlanadi”.
Konashenkovning qoʻshimcha qilishicha, rossiyalik harbiylar raketa majmualarini “Ambal” yuk kemasida tashishganda ataylab uni yashirishmagan. Bu AQSh razvedkachi sunʼiy yoʻldoshining parametrlarini aniqlash uchun qilingan, deb aytdi Konashenkov.
“Raketa majmualarini tashish sir tutilmadi. “Iskander” yuk kemasiga ortilishidan oldin bu hududdan uchib oʻtayotgan amerika razvedkachi suniy yoʻldoshi uchun uning ishlash parametrlarini aniqlash maqsadida ataylab qoʻyib qoʻyildi. Uzoq kutishga toʻgʻri kelmadi – amerikalik hamkorlar goʻyoki bizni fosh qilishgandek, buni oʻzlari bizga tasdiqlashdi”,- dedi Konashenkov.
7 oktyabr kuni “Reuters” axborot agentligi AQSh razvedkasidagi manbaga iqtibos keltirgan holda Rossiya Kaliningrad viloyatiga “Iskander-M” raketa majmualarini tashlayotganini maʼlum qilgan edi.
Maʼlumotlarga koʻra, ushbu majmua 500 km gacha uzoqlikdagi nishonni moʻljalga olishga qodir.
