Putin Istambulda Erdogʻan bilan uchrashdi
Turkiya Prezidenti Rajab Toyyib Erdogʻan uchoq krizisidan soʻng ilk bor Turkiyaga safar qilgan Rossiya Prezidenti Vladimir Putin bilan Mabeyn saroyida uchrashdi. Ikki mamlakat rahbarlari oʻz delegatsiyalari hamrohligida bir soat qirq daqiqa davom etgan muzokaralardan soʻng qoʻshma matbuot anjumani tashkil qilishdi. Soʻngi xabarlarda aytilishicha, anjuman chogʻida ikki rahbar barcha sohalarda oʻzaro hamkorlikni rivojlantirish haqida kelishib olganliklarini maʼlum qilishgan.
Turkiyaning Energiya vaziri Barot Albayrak va Rossiya Energetika vaziri Aleksandr Novak oʻrtasida “Turkiya Oqimi” (Rossiyadan boshlab qora dengiz orqali Turkiyagacha yotqiziladigan quvur) loyihasi haqida bitim imzolanishi ortidan bayonot bergan Erdogʻan Rossiya rahbari bilan barcha sohalarda kelishib olganligini bildirdi.
“Biz janob Prezident bilan toʻliq bir kun birga boʻldik. Nihoyat, mazkur shartnomalarni imzolash nuqtasiga yetib keldik va imzolar chekildi. Kelajakda mudofaa, savdo, madaniyat sohalari kabi, koʻp sohalarda barcha munosabatlarimizni rivojlantirishga kelishib oldik. Yuqori darajali maslahat kengashi yigʻilishi borasida koʻrsatmalar berdik. Shu yilning oxirida yoki keyingi yilda shu masalalar ustida muzokaralarimizni amalga oshiramiz. Albatta, mintaqadagi juda nozik masala, Suriya masalasini ham batafsil muhokama qilishga imkon topdik. Furot qalqoni borasida qanday hamkorlik qila olishimiz haqida gaplashib oldik”, dedi jumladan Turkiya prezidenti.
Oʻz navbatida prezident Putin turkiyalik hamkasbi bilan ikki mamlakat uchun juda muhim sanalgan masalalar muhokama qilinganliklarini taʼkidlar ekan, bundan buyon Rossiyada meva-chevalar orzonlashishidan xursandchiligini yashirmadi.
“Bugun biz Turkiyadan olingan ayrim qishloq xoʻjalik mahsulotlarini Rossiya bozorlariga chiqardik. Xususan, tsitrus mevalar Rossiyada yetishtirilmaydi. Agar bu yerdan eksport qilinsa Rossiyada bunday mevalarning narhlari arzonlashadi”, dedi Putin.
