Xitoy ham rasman Asadga yordam berishni boshladi
Xitoy harbiy masʼullari Suriya armiyasini qurol yaroq va harbiy taʼlim jihatidan qoʻllab quvvatlashini rasman eʼlon qildi.
Xitoy davlat televideniyasining harbiy masʼullarga tayanib xabar qilishicha, Xitoy hukumati Asad armiyasiga harbiy mashgʻulotdan oʻtkazish va qurol yaroq orqali yordam berish haqida qaror qabul qilgan.
Xorijiy axborot agentliklarining maʼlumotlariga koʻra, Xitoy harbiy kuchlari birinchi marta Suriya armiyasiga yordam berishini rasman eʼlon qilmoqda. Xabarda aytilishicha, Suriya mudofaa vaziri bilan Xitoy harbiy vakillari yakshanba kuni Damashqda oʻtgazgan uchrashuvida oʻzaro muhim qarorlar qabul qilgan. Bu qarorlar orasida Xitoy armiyasining Suriyaga yordam sifatida Asad armiyasini harbiy mashgʻulotdan oʻtkazib berishi ham oʻrin olgan.
“Doğan” axborot agentligi tarqatgan xabarga koʻra, Xitoy admirali Guan Youfey Suriya mudofaa vaziri Fahad Yassim bilan uchrashib, oʻzaro hamkorlik va aloqalarni rivojlantirish haqida gaplashib olishgan.
“Xitoy va Suriya armiyalari oʻrtasida anʼanaviy doʻstlik aloqalari mavjud. Xitoy armiyasi hozirda Suriya armiyasiga yordam koʻrsatish va u bilan hamkorlik qilishni umid qilmoqda”, dedi Guan Youfey Suriya mudofaa vaziri bilan uchrashgandan soʻng bergan bayonotida.
Xitoy uzoq vaqtdan buyon Rossiya bilan birgalikda Asad rejimini siyosiy tarafdan dastaklab kelmoqda. BMT Xavfsizlik Kengashi tarafidan Asad rejimiga qarshi chiqarilgan qarorlarga nisbatan Xitoy hukumati toʻrt marta veto qoʻygan.
