Qirgʻiziston “mustaqillik”ka erishganidan beri uchta prezident almashgan boʻlishiga qaramay shu vaqtga qadar Qirgʻizistonda taqiqlangan diniy adabiyotlar roʻyxati eʼlon qilingani yoki teologik (diniy) ekspertiza oʻtkazish huquqiga ega boʻlgan biror idora tashkil qilingani yoʻq. Bundan rasmiy hukumat va kuch organlari oʻzlari uchun istalmagan boʻlgan dindor shaxs yoki islomiy tashkilot aʼzolariga, xususan, Hizb ut-Tahrir yigitlariga qarshi qoʻllashda unumli foydalanib kelishmoqda.
Qirgʻizistonda taqiqlangan adabiyotlar roʻyxatining yoʻqligi va taqiqlangan adabiyotlar roʻyxati rasmiy axborot vositalari orqali eʼlon qilinmagan boʻlsada, kuch organlari Islom daʼvatini koʻtarib chiqqan shaxs yoki tashkilot aʼzolarining xonadonlariga uyushtirgan reydlari ortidan qoʻlga kiritilgan Qurʼoni Karim, Hadislar toʻplami va boshqa – garchi hukumat ruxsati bilan bosib chiqarilgan boʻlsa ham – islomiy adabiyotlarni rasmiy axborot vositalari orqali namoyish qilib, u shaxsni xali aybi isbotlanmay turib yomonotliqqa chiqarib ulgurishmoqda.
Teologik (diniy) ekspertiza oʻtkazish esa din ishlari boʻyicha qoʻmita yoki muftiyot vakillariga topshirib qoʻyilgan boʻlib, ular tintuv davomida topilgan adabiyotlarni kuch organlari xohishiga muvofiq ekstremistik yoki ekstremistik emas degan xulosa chiqarib berishadi. Mana shunday sharoitda rasmiy hukumat avval mamlakat hududida taqiqlangan adabiyotlar roʻyxatini chop qilish va teologik ekspertiza oʻtkazish salohiyati va layoqatiga ega boʻlgan biror qoʻmita tashkil etish oʻrniga, ekstremizm (Islom)ga qarshi kurashni kuchaytruvchi qonunlar qabul qilmoqda. Bu esa oʻz navtabida musulmonlarga bosim oʻtkazish va ulardan nohaq yoʻllar bilan pul undirishda kuch organlariga qoʻl kelmoqda.
Kuni kecha Qirgʻiziston prezidenti Almazbek Atambayev yana shunday qonunlardan biri, “Ekstremistik faoliyatga qarshi kurash toʻgʻrisida”gi qonunni imzoladi. Mazkur qonun loyihasi 2016 yil 25 may kuni Jogorku Kenesh tomonidan tasdiqlangan edi.
