Singapurda “Osiyo-Tinch okeani mintaqasi” hukumatlararo xavfsizlik forumi bo‘lib o‘tdi. O‘n beshinchi yili bo‘lib o‘tayotgan mazkur forumda Osiyo-Tinch okeani davlatlarining xavfsizlik masalasi muhokama qilindi. Shuningdek bu yilgi forumda Osiyoda xavfsizlik masalalari, Osiyo-Tinch okeani mintaqasidagi harbiy raqobat, dunyodagi noaniqlik qarshisida mintaqa davlatlarining mudofaa siyosati, mintaqaviy mojarolarning yechimlarini qiyinlashtirgan murakkab muammolar va mintaqadagi xavfsizlik sohasida hamkorlik masalalari muhokama qilindi.
Uch kun davom etgan “Shangri-La muloqoti”, nomli bu forum, markazi Londonda joylashgan xalqaro strategik tadqiqotlar instituti tarafidan olib borildi. Uchrashuvda Forumning doimiy a‘zosi bo‘lgan Avstraliyadan tortib, Vetnamgacha bo‘lgan 28ta Osiyo-Tinch okeani davlatlarining mudofaa vazirlari, qurolli kuchlari qo‘mondonlari, siyosatchilari va turli mamlakatlardan kelgan mutaxassislar xalqaro hodisalarga o‘z fikr va mulohazalarini bildirishdi.
Osiyoda murakkab xavfsizlik masalalariga bag‘ishlangan forumnning birinchi majlisida AQSh Mudofaa vaziri Eshton Karter nutq so‘zladi. Pentagon rahbari o‘z nutqida Vashingtonning Osiyo-Tinch okeani mintaqasidagi harbiy siyosatini amalga oshirish bo‘yicha ko‘z-qarashini e‘lon qilar ekan, Osiyoda Xitoyga qarshi NATOga o‘xshash yana bir harbiy tashkilot tuzish taklifini o‘rtaga tashladi.
Karterning ta‘kidlashicha, Osiyo-Tinch okeani mintaqasida urush, tinchlik va barqarorlikni ta‘minlash Yevropadagi NATOga o‘xshash markazlashgan tashkilot tomonidan nazoratga olinmagan. Shunday ekan, mintaqaning xavfsizligi borasida xuddi NATO kabi harbiy ittifoq lozim bo‘ladi.
Rossiyaning “Nezavisimaya” gazetasiga ko‘ra, Xitoyning tobora ortib borayotgan iqtisodiy va harbiy quvvati Tinch okeani mintaqasida va umuman jahon miqyosida Amerikaning ustunlik umidlariga putur yetkazishi mumkin. Shuning uchun Oq uy mintaqadagi davlatlarning harbiy kuchlarini birlashtiradigan harbiy tashkilotga muhtojdir.
