Rossiya va Turkiya o‘rtasida yuzaga kelgan havo inqirozidan keyin ikki davlat bir-biriga qarshi bayonotlar berib kelayotgan edi. Ammo Turkiya prezidenti Rajab Toyyib Erdog‘an 12 iyun kuni nishonlanadigan “Rossiya kuni” munosabati bilan Rossiya Prezidenti Vladimir Putinga maktub yo‘llab Turkiya-Rossiya munosabatlarini qayta tiklashga umid bildirdi.
Sputnik axborot agentligi tarqatgan xabarga ko‘ra, Prezident Erdog‘an “Rossiya kuni” bahonasida Putinga tabrik yo‘llab yozgan maktubida Moskva va Anqara o‘rtasidagi munosabatlar eski holiga qaytib, munosib darajaga yetishiga umid bildirgan.
“Janob prezident, Turk xalqi nomidan barcha rus xalqini Rossiya kuni bilan tabriklayman. Xususan, Rossiya va Turkiya o‘rtasidagi munosabatlarning yaqin kelajakda munosib darajaga yuksalishidan umidvorman”, deyiladi maktubda.
O‘z navbatida Turkiya Bosh vaziri Binali Yildirim ham rus hamkasbi Dmitriy Medvedevga tabrik maktubi yo‘lladi. Yildirim maktubida ikki mamlakat xalqlarining umumiy manfaatlari uchun o‘zaro hamkorlik yana qayta yo‘lga qo‘yilishiga umid bildirdi.
“Davlatlarimiz o‘rtasidagi hamkorlik va munosabatlarning yaqin kunlarda xalqlarimizning umumiy manfaatlari uchun zarur bo‘lgan darajaga yetishini umid qilaman”, “Siz tufayli butun ruslarga sog‘lik va farovonlik nasib etishiga tilakdoshman”, deyiladi Bosh vazir Yildirimning Medvedevga yozgan maktubida.
Erdog‘an va Yildirimning Putin bilan Medvedevga tabrik yo‘llashi Rossiya harbiy samalyotlari Asad kuchlari bilan birga Suriyaning Damashq, Idlib va Halab kabi bir qancha shaharlarida musulmonlarni qirg‘in qilayotgan paytga to‘g‘ri keldi.
Markazi Londonda joylashgan Inson huquqlari bo‘yicha Suriya kuzatuv observatoriyasi Suriyada Ramazon oyining birinchi haftasida 67 bola, 28 ayol, jami 224 kishi o‘ldirilganligini ma‘lum qildi.
Asad va Rossiya kuchlari Ramazonda aynan iftor va saharlik vaqtini qonga bo‘yamoqda. Kechqurun odamlar Iftor uchun o‘tirib bo‘lgan vaqtda havo hujumlariga uchrashi oqibatida ko‘p oilalar vayronalar ostida qolib, halok bo‘lyapti. Hujumlar asosan odamlar zich yashaydigan mahallalar bo‘ylab amalga oshirilmoqda.
