Saudiya Arabistoni rahnamoligida 34 Islomiy davlat askarlari ishtirokida o‘tkazilgan harbiy mashg‘ulotdan so‘ng poytaxt Riyozda o‘zaro qo‘shinlarni muvofiqlashtirish markazi tashkil etilishi haqida e‘lon qilindi. O‘tgan mart oyida Saudiya Arabistonining tashabbusi bilan o‘ttiz to‘rtta Islomiy o‘lkalar armiyasi mushtarak harbiy mashg‘ulot o‘tkazgan edi. Bugunga kelib, ular o‘rtasida mushtarak muvofiqlashtirish markazi orqali hamkorlikni kengaytirish loyihasi tuzilmoqda.
Xorijiy axborot agentliklarining xabariga ko‘ra, qo‘shma muvofiqlashtirish markazini tashkil etish shu Ramazon oyida amalga oshirilishi kutilmoqda. Saudiya Arabistoni rasmiylari tarafidan muvofiqlashtirish markaziga doir berilgan bayonotda bildirilishicha, muvofiqlashtirish markazini tashkil qilish uchun tayyorgarlik allaqachon boshlab yuborilgan.
“Keyingi qadam harbiy koalitsiyaga a‘zo davlatlar mudofaa vazirlarining uchrashuvi bo‘ladi. Bu uchrashuv Ramazon oyida bo‘lib o‘tishi ham mumkin. Ayni paytda Ar-Riyod shahrida koalitsiya markazini tashkil etish uchun tayyorgarliklar olib boryapmiz. Muvofiqlashtirish markazida har bir a‘zo davlatning harbiy mas‘ullari vakil sifatida ishtirok etishadi. Harbiy koalitsiyaga a‘zo davlatlar bu markazdan “jangarilar” faoliyatiga qarshi yordam talab qilishlari mumkin”, deyiladi bayonotda.
Eslatib o‘tish joizki, Saudiya Arabistoni o‘tgan yilning 15 dekabri kuni “terrorizm”ga qarshi kurashuvchi 34ta musulmon davlatidan iborat harbiy koalitsiya tashkil qilinganini e‘lon qilgan edi. Buning ortidan AQSh mudofaa vazirligi mazkur 72 soat ichida tuzilgan koalitsiyani qutlab chiqib, uning kelajagiga umid bildirgan edi.
