O‘zbekiston hukumati 2016 yil Rossiyaning Gazprom shirkatiga sotadigan o‘zbek gazining narxini orzonlashtirdi. Gazprom shirkati gaz sotib olish borasida Turkmaniston mas‘ullari bilan kelisha olmagach, O‘zbekistondan avvalgi narxidan ko‘ra arzonroq narxda, yana ham ko‘proq gaz sotib olishini e‘lon qildi.
Rossiyaning TASS axborot agentligi tarqatgan xabarga ko‘ra, Rossiyaning Gazprom shirkati 2015 yilda o‘tkazilgan muzokaralar natijasida O‘zbekiston va Qozog‘istondan sotib oladigan tabiiy gaz narxini orzonlashtirishga muvaffaq bo‘lgan. Lekin tabiiy gaz narxlari qanchaga orzonlashtirilganligi haqida hozircha hech qanday ma‘lumot yo‘q.
Gazprom shirkati tomonidan taqdim qilingan hujjatlarda aytilishicha, Turkman rasmiylari bilan narx bo‘yicha kelisha olmagan Rossiya shirkati Turkmaniston bilan tuzgan gaz shartnomasini bekor qilib, O‘zbekistondan ko‘proq gaz sotib olish borasida shartnoma tuzgan.
2016 yilda Rossiya O‘zbekistondan juda arzon narxda 3.1 milliard kub metr gaz sotib olishi taxmin qilinmoqda. O‘zbekiston Rossiya va Xitoyga gaz eksportini oshirayotgan bir paytda mamlakat aholisi va sanoat korxonalari doimiy tarzda gaz ta‘minoti borasida katta muammolarga duch kelayotgani bod-bod quloqqa chalinishi odatga aylangan.
Eslatib o‘tish joizki, O‘zbekiston Respublikasi Moliya Vazirligi tarafidan tabiiy gaz uchun belgilargan umumiy ko‘rsatmalarga binoan, O‘zbekistonda joriy yilning 1 aprelidan boshlab aholiga beriladigan tabiiy gazning narxi 8%ga oshirilgan.
