AQSh Afg‘onistondagi urushda ishlatib bo‘lgan harbiy texnikalarni “terrorizmga qarshi kurashni qo‘llab-quvvatlash uchun” harbiy yordam sifatida Misrga “hadya” qildi. Mazkur zirhli harbiy texnikalarning birinchi qismi kuni kecha Iskandariyya bandargohiga yetib keldi. AQShning Qohiradagi elchixonasidan chiqarilgan yozma bayonotda Amerika Qo‘shma Shtatlari Misr armiyasini qo‘llab quvvatlash uchun yuborgan minalarga qarshi zirhli harbiy avtomobillar mamlakat shimolidagi bandargohga yetib kelganligi alohida qayd etildi.
Bayonotda aytilishicha, portlovchi moddalar va minalardan himoya qilish uchun mo‘ljallangan bu maxsus avtomobillar terrorizmga qarshi kurash va ichki barqarorlikni mustahkamlash maqsadida “evaz kutmagan holda, tekinga” Misrga yuborilgan. Harbiy texnikalarning aniq soni haqida ma‘lumot yo‘q. Hozirda Iskandariyya bandargohiga yetib kelgan 762 dona zirhli anti-mina avtomobillar “hadya”ning birinchi qismi ekanligi aytilmoqda.
AQShning Qohira elchixonasidagi yuqori martabali vakillaridan biri Charles Hooper ham harbiy texnikalarning yuborilishidan maqsad mintaqada beqarorlik hukm surayotgan bir vaqtda Misr qo‘shinlarini qo‘llab quvvatlash ekanligini ta‘kidladi. Vakilga ko‘ra, bu “hadya” ikki davlat o‘rtasidagi mustahkam aloqalarning bir ko‘rinishidir.
AQSh tashqi ishlar vazirligi tarafidan har yili chiqariladigan hisobotda e‘lon qilinishicha, Qo‘shma Shtatlardan eng ko‘p harbiy yordam oladigan birinchi davlat Isroil bo‘lsa, undan keyingi o‘rinda Misr turadi. 1979 yilda AQSh nazorati ostida Isroil va Misr o‘rtasida imzolangan Kemp-Devid kelishuvidan so‘ng Qo‘shma Shtatlar Misrga har yili ma‘lum miqdorda harbiy yordam yuborib turishni o‘z zimmasiga olgan. Bu miqdor 1987 yildan e‘tiboran 1,3 milliard dollar qilib belgilangan.
