Erdogan: Xavfsizlik Kengashiga doimiy a‘zo davlatlar orasida musulmon davlatining yo‘qligi adolatdan emas
O‘tgan shanba kuni Turkiya prezidenti Rajab Toyyib Erdogan “Xavfsizlik Kengashiga doimiy a‘zo davlatlarning beshalasi ham masihiy davlat, ularning orasida birorta ham musulmon davlati yo‘q, bu esa adolatdan emas”, dedi. Keyin “Biz adolat hukmron bo‘lgan olam yaratish uchun kurashamiz va shunga harakat qilamiz”, deya qo‘shimcha qildi.
Turk prezidenti “BMT tashkilotining hozirdagi ishlash mexanizmini isloh qilish kerakligini hamda barcha qit‘alar va diniy jamoalarni o‘zida gavdalantirgan xalqaro xavfsizlik kengashiga butun insoniyatning muhtojligini” urg‘uladi.
Erdogan Istanbuldagi bir nechta xizmat ko‘rsatish loyihalarining ochilish marosimida Xavfsizlik Kengashiga doimiy a‘zo davlatlarga ishora qilib, olam bu beshta davlatdan kattaroq ekaniga e‘tiborni qaratdi. So‘ng “dunyodagi 196 davlat taqdirini shu beshta davlatning labi orasiga tashlab qo‘yishimiz mumkin emas. Ehtimol, bu birinchi jahon urushi sharoitida mumkin bo‘lgandir. Ammo hozir mumkin emas”, deya qo‘shimcha qildi. (Arabiy 21).
Roya gazetasi sharhi:
Agar Erdogan adolat hukmron bo‘lgan olam yaratish uchun kurashi va harakatida chindan ham jiddiy bo‘lganda edi, Turkiyada Payg‘ambarlik minhoji asosidagi roshid Xalifalik davlatini e‘lon qilgan bo‘lar edi. Chunki shu davlatgina Islomni tatbiq qilish bilan olamda adolat o‘rnatadi. Biroq Erdogan qanday ham jiddiy bo‘lsin, axir, u ilmoniy dasturni o‘z zimmasiga olgan bo‘lsa!?
Keyin, Erdogan Xavfsizlik Kengashidagi muammo islomiy yurtlardagi davlatlardan birortasining unga a‘zo bo‘lmaganida emas, balki bu kengashning mustamlakachi davlatlar, xususan Amerika qo‘lidagi bir qo‘g‘irchoqligida ekanini bilmaydimi??!! Shuningdek, Xavfsizlik Kengashidagi muammo uning ushbu davlatlardagi adolatsiz qonunlarga tayanishida ekanini, Turkiya va boshqa birorta davlatning Xavfsizlik Kengashiga a‘zo bo‘lib qolishi bilan hech narsa o‘zgarmasligini tushunmaydimi?!!
Shuningdek, Turkiyada AQSh qo‘shinlari uchun Injirlik bazasini ochib bergan, yahudiylar davlati bilan aloqa o‘rnatib kelayotgan, G‘arb siyosatini ijro qiluvchi qo‘g‘irchoqlardan biri bo‘lgan bu Erdogan, G‘arb davlatlariga va ularning islomiy olamga nisbatan aralashuvlariga go‘yo qarshi turgandek hamda Xavfsizlik Kengashiga a‘zo bo‘lishni kuchli pozitsiyani egallash maqsadida xohlayotgandek gapiryapti.
Xavfsizlik Kengashi mustamlakachi G‘arb davlatlari qo‘lidagi bir qo‘g‘irchoq tashkilot ekanini tushungan va uning hukmronligidan ozod bo‘lishni xohlayotgan har bir kishi bu tashkilotni isloh qilishga urinmasligi kerak. Balki uni parchalab tashlashning, mustamlakachi davlatlar hukmronlik qilolmaydigan yangi olamiy tashkilotga almashtirishning muqaddimasi sifatida unga qarshi xalqaro jamoatchilik fikrini paydo qilmog‘i lozim. Bu yangi tashkilot olamshumul tashkilot bo‘lib, zulmni oldini olishga va mazlumga yordam berishga asoslanishi hamda butun bashariyat o‘rtasida adolat ulashishi lozim. U biror bir davlatning hisobiga harakat qilmaydigan, balki butun bashariyat manfaati uchun harakat qiladigan olamshumul tashkilot bo‘lgani bois ma‘naviy kuchga ega bo‘ladi, xalqaro jamoatchilik ham uni qo‘llab-quvvatlab, o‘z hurmat va ishonchini bildiradi.
Roya gazetasining 2016 yil 13 aprel chorshanba kungi 73-sonidan
