“Interfaks” axborot agentligi xabariga ko’ra, 2 aprelga o’tar kechasi Tog’li Qorabog’da Ozarboyjon-Armaniston nizosi yana yangilandi. Xabar qilinishicha, armanistonlik harbiylar tomonidan Ozarbayjon vertolyoti urib tushirilgan va shundan so’ng qarshi tomondan artilleriya orqali javob zarbalari yo’llangan.
Armaniston Mudofaa vazirligi matbuot xizmati boshlig’i Artsrun Ovannisyanning feysbukdagi o’z sahifasida ma’lum qilishicha, ozarbayjonliklar hujumga o’tishgan va ikki tomon o’rtasidagi nizolarga sabab bo’ladigan Tog’li Qorabog’ hududida harbiy harakatlar boshlangan.
U Ozarbayjon tomonidan Armanistondagi tinch aholi istiqomat qiluvchi nuqtalarga hamda harbiy qismlarga artilleriya zarbalari berilayotganini ta’kidlagan.
Uning aytishicha, Armaniston armiyasi qarshi hujumga o’tishga majbur bo’lgan.
“Ikki tomonda ham qurbonlar bor. Ozarbayjon tomonining talofatlari ko’proq, ulardagi harbiy texnikalarga zarar etgan va bir vertolyot yo’q qilingan”,- deydi Ovannisyan.
O’z navbatida rasmiy Baku bu ma’lumotlarni inkor qilib, armanlarning navbatdagi ig’vosi deb atadi. Ozarbayjon mudofaa vazirligi hisobi bo’yicha, 2 aprelga o’tar kechasi Armaniston harbiylari chegara tartibini 127 marta buzib o’t ochgan. Vazirlik xabariga ko’ra, vertolyotni urib tushirilgani to’g’risidagi xabar ham yolg’on.
Turkiston:
Mustamlakachi davlatlarning biron mintaqaga kirib kelishi yoki o’rnatgan nufuzini yo’qolib borishini oldini olish uchun qo’llaydigan eng mashhur usullaridan biri o’sha davlatda millatlararo yoki dinlararo nizoni vujudga keltirishdan iborat. Sobiq sho’rolar davlati ham inqirozga yuz tutib, hayot maydonidan yo’q bo’lib ketishi aniq bo’la boshlagach o’z umrini oz bo’lsa ham uzaytirish ilinjida va qo’l ostidagi respublikalar mustaqillik da’vo qilishlarini oldini ilinjida bu erlarda harbiy ishtirokini kuchaytirishga kirishdi. Bu maqsadini amalga oshirish uchun esa mustamlakasi ostidagi davlatlarda birin-ketin millatlararo nizo qo’zg’ay boshladi.
1989 yil yozida O’zbekistonda o’zbek-turk, 1990 yilda Qirg’izistonda qirg’iz-o’zbek nizolarini paydo qilgani kabi Kavkaz mintaqasida ozar-arman qarama-qarshiligini paydo qildi. Rus hukumati qo’llovi va da’vati natijasida Tog’li Qorabog’ 1988 yilda Ozarbayjon tarkibidan chiqishini e’lon qilgach, ikki davlat o’rtasida boshlangan nizo to shu kunga qadar davom etib kelmoqda. Rasmiy xabarlarga ko’ra, Tog’li Qorabog’ inqirozi 30 mingdan ziyod inson umriga zomin bo’lgan.
