Qozog’istonda 20 mart kuni natijalari oldindan ma’lum bo’lgan muddatidan oldingi parlament saylovlari bo’lib o’tdi. Bu saylovlarda kutilganidek Qozog’iston prezidenti Nursulton Nazarboev boshchilik qiladigan “Nur Otan” partiyasi mutlaq ustinlik bilan g’alaba qazondi. Dastlabki saylov natijalari e’lon qilinganidan so’ng Nursulton Nazarboev “Nur Otan” partiyasi saylovoldi shtabidagi tarafdorlariga murojaat qildi.
“Dastlabki ma’lumotlarga ko’ra, saylovchilarning aksariyati “Nur Otan” partiyasiga ishonch bildirdi – bu butun xalqning g’alabasi”,- deb aytdi Nazarboev.
Nazarboevning aytishicha, mamlakat aholisi shu ishonchi bilan partiya olib borayotgan yo’nalish, dastur va islohotlarni yana bir bor qo’llab-quvvatladi. Prezident saylovlarda ovoz bergan barchaga minnatdorchilik bildirdi.
Nazarboev boshqa partiyalar tomonidan aytilgan takliflar etakchi partiya tomonidan inobatga olinishini ta’kidladi.
Dastlabki hisoblarga ko’ra, “Nur Otan” 82 foiz ovoz to’pladi. Undan keyingi o’rinlarda deyarli bir xil ovoz to’plagan “Ak jo’l” partiyasi va Kommunistik partiya kelmoqda: partiyalar 7,20 foizdan ovoz to’plashgan.
