Navro’z bayramiga tayyorgarlik ko’rilishi munosabati bilan O’zbekiston respublikasi milliy xavfsizlik xizmatining chegara qo’shinlari tomonidan davlat chegarasini, xususan, Qirg’iziston bilan chegarani qo’riqlashni kuchaytirish bo’yicha chora-tadbirlar ko’rilgan. Bu haqida O’zbekiston respublikasi milliy xavfsizlik xizmati davlat chegaralarini qo’riqlash qo’mitasi vakiliga tayanib, “Podrobno” axborot agentligi xabar tarqatdi.
Uning so’zlariga ko’ra, chegarani qo’riqlashga bronetexnika vositalari ham jalb qilingan. Ammo “ushbu barcha harbiy texnika vositalari mamlakat hududida joylashgan, davlat chegarasini qo’riqlash belgilanmagan chegaralarga kirmaslik bo’yicha ikkitomonlama shartnomalarga binoan amalga oshirilmoqda”.
Shu bilan birga, 2016 yilning 18 mart kuni ta’mirlash-tiklash ishlari sababli “Madaniyat-avtoyo’l” xalqaro punkti bir tomonlama tartibda yopilgan va bu haqida Qirg’iziston tarafi tegishli kanallar orqali o’z vaqtida xabardor qilingan. O’zbekiston respublikasi milliy xavfsizlik xizmati davlat chegaralarini qo’riqlash qo’mitasi qirg’izistonlik hamkasblarini haqiqatdan yiroq axborotlarni tarqatishdan tiyilishga chaqirdi.
18 mart kuni Qirg’iziston Respublikasi tashqi ishlar vazirligiga mamlakatdagi O’zbekistonning favqulodda va muxtor elchisi K.Rashidov chaqirilgan.
Bu haqida Qirg’iziston tashqi ishlar vazirligi rasmiy saytida xabar beriladi. Uchrashuvda Qirg’iziston TIV vakili B.Sidikov O’zbekiston elchisiga Qirg’iziston respublikasi Jalolobod viloyati Olabuqa tumanidagi Kerben yo’li 20-kilometrida o’zbek harbiylari tomonidan o’rnatilgan ikkita blok postni olib tashlash haqidagi notani topshirgan.
TIV vakili ushbu vaziyat chegara hududda joylashgan aholi o’rtasida kelishmovchilikka sabab bo’lishi mumkinligini aytib o’tgan.
