Avval xabar qilganimizdek, Chexiya parlamentining deputatlar palatasi raisi Yan Gamachek ikki kunlik rasmiy safar bilan Qirg’izistonga keldi. 16 mart kuni Bishkekka etib kelgan Yan Gamachek prezident Almazbek Atambaev va bosh vazir Temir Sarievlar qabulida bo’ldi.
Qirg’iziston bosh vaziri Temir Sariev Yan Gamachek boshchiligidagi delegatsiya bilan bo’lgan uchrashuv chog’ida, Chexiyaning ikki kompaniyasi bilan kichik GESlar qurish bo’yicha kelishuv imzolanishini ma’lum qildi. Uning so’zlariga ko’ra, loyihaning umumiy qiymati 190 million dollarni tashkil etadi.
Bundan tashqari Sariev Praga-Bishkek-Seul aviaqatnovini ochish, sayyohlik sohasida hamkorlikni rivojlantirish masalasini ko’tardi.
Chexiyaning Qirg’izistondagi muxtor elisi Elishka Jigova Chexiya Qirg’iziston bilan hamkorlikni kengaytirishdan manfaatdor bo’lib, savdo-iqtisodiy, madaniy va sayyohlik tarmoqlari bo’yicha loyihalarni muhokama qilishga tayyor ekanligini bildirdi.
