Shia oqimining taniqli ulamolaridan biri Subhi Tufayli Eron hukumatini la’natga loyiq siyosat olib borayotganlikda aybladi. Subhi Tufaylining da’vo qilishicha, Eron hukumati Hizbulloh nomi bilan tanilgan tashkilotga mazhablararo urush chiqarish vazifasini topshirgan. Tufayliga ko’ra, Quddusni ozod qilish uchun biror ishga qo’l urmagan Eron hukumati Islom olamini bir biri bilan urushtirishga harakat qilayotgan AQSh va Isroil bilan hamkorlikda faoliyat olib bormoqda.
“Eron Hizbullohga mazhablararo urush chiqarish vazifasini topshirdi. Bu urush Amerika va Isroilning foydasiga xizmat qiladi. Biz bugun mintaqamizda katta fitna ichida qoldik. Islom o’lkalarining kuchlari va imkoniyatlari tugab bormoqda. Iroqda, Liviyada, Afg’onistonda, Pokistonda, Suriyada, Yamanda.., har erda bir islomiy guruh boshqa bir islomiy guruhga qarshi urushga kirgizilmoqda. Biri boshqasini yo’q qilmoqda. Bundan kimga foyda? Bular tasodifmi? Bu holatlar oldindan rejalashtirilmay amalga oshirilyaptimi? Yo’q, aslo unday emas. Bu AQSh va Isroilning rejasidir. Bu reja musulmonlar bir birini o’ldirishlari uchun tuzilgan rejadir. AQSh va Isroil uchun eng yaxshi kun – Musulmon Musulmonni o’ldirgan kundir. Bu davlatlarning barchasi AQShga bog’liq holda faoliyat olib borishadi va hozirda bularning hammasi AQShga muxtoj holatga tushib qoldi. Suriyadagi boshqaruv AQShga bog’liq holda urushlarni davom ettirmoqda. Iroq, Suriya va butun Islom olamidagi siyosat AQShning foydasiga qaratilgan. Eron la’natga loyiq siyosat olib bormoqda. Bu erda Eron va boshqa davlatlar AQSh bilan hamkorlikda ish olib bormoqda. Bugun Musulmon o’lkalar AQShga yaxshi ko’rinish uchun intilishmoqda. Eron ham shular qatorida ekanligi aniq. Boshqa Islom o’lkalari ham shunga o’xshash ishlarni amalga oshirishmoqda. Musulmonlarning birligi bu shaklda yuzaga kelmaydi. Mazhabparastlik va fitna-fasod bilan Islomga xizmat qilinmaydi. Eron quddusni ozod qilish istagini bildiradi, ammo bunga doir biror ish qilmaydi”, dedi Hizbulloh tashkilotining sobiq bosh kotibi Subhi Tufayli.
