Vena uchrashuvi ortidan Saudiya Arabistoni poytaxti ar-Riyoz shahrida Suriya muxolifatini birlashtirish maqsadida tashkil qilingan yig’ilish yakunlandi. Yig’ilishda G’arb davlatlari va Yaqin Sharq ittifoqchilari ikki kun davomida 40 nafar Suriya muxolifati vakillari bilan uchrashuv o’tkazdi.
Uchrashuv so’ngida ayrim guruhlarning izohlariga qaramay, Asad rejimi bilan muzokara olib borish uchun hay’at tashkil qilish to’g’risida qaror qabul qilindi. Bu ish AQSh va G’arb tomonidan qo’llab-quvvatlanib kelayotgan ozod Suriya armiyasi va Suriya milliy koalitsiyasi rahnamoligida olib borilishi belgilandi.
Ar-Riyoz shahrida bo’lib o’tgan Suriya muxolifati yig’ilishida bir necha tarkibiy muammolar bo’lsa-da, quyidagi nuqtalarda o’zaro kelishib olingani qayd etildi:
1- Suriyaning hududiy yaxlitligini va xalq birligini himoya qilish.
2 – Demokratik va fuqarolik davlat qurish.
3 – Quroldan foydalanish bo’yicha davlat monopoliyasini joriy etish.
4 – Terrorizmning (Islomiy boshqaruvning) barcha shakllarini rad etish.
5 – Xorijiy jangchilarni rad etish.
6 – Demokratiya, inson huquqlari va qonun ustuvorligiga rioya qilish.
7- Asosiy tashkilotlar va armiyani yangidan qayta tashkil qilish.
Asad rejimi bilan muzokara qilish uchun 13-15 kishidan iborat bir hay’at tashkil qilish rejasi tuzildi. Bu hay’atga qurolli guruhlardan to’rt kishi, Suriya milliy koalitsiyasidan to’rt kishi, mustaqil shaxslardan uch kishi va milliy kengashdan ikki kishi ishtirok etishiga qaror qilindi.
AQSh Davlat kotibi Jon Kerri yig’ilishning mazkur natijalaridan boshi osmonga etganligini bildirdi. Kerri bu haqida bayonot berib, Suriya muxolifati ko’p partiyaviy, demokratik Suriya uchun zaruriy tamoyillar borasida hamfikr ekanliklaridan g’oyatda mamnun ekanligini aytib o’tdi.
Shuningdek, Kerri Suriya muxolifati a’zolaridan iborat muzokara hay’atini tuzishga rozilik bildirgan vakillarni bir joyga jamlay olgan Saudiya tashqi ishlar vaziri Adil bin Ahmad al-Jubayrni ijobiy taqdirlashini ta’kidladi.
