AQSh hukumati Turkiya, Iordaniya va Saudiya Arabistoni bilan hamkorlikda olib borayotgan Suriya mu’tadil muxolifatini “harbiy mashg’ulot”dan o’tkazish va mujohidlarga qarshi qurollantirish dasturidan voz kechdi. Bu haqida AQShda chiqadigan “New York Times” gazetasi Obama idorasiga yaqin manbaga tayanib xabar tarqatdi.
Gazeta tarqatgan xabarga ko’ra, Voshingtondan bu mavzuga doir rasmiy bayonot kelishi kutilmoqda. Nomi oshkor qilinishini istamagan AQSh mudofaa vazirligining oliy darajadagi mas’ullaridan biri ham Suriya mu’tadil muxolifatining Iordaniya, Qatar, Saudiya Arabistoni va Birlashgan Arab Amirligida “Harbiy mashg’ulot” dasturi tugatilishi haqida ma’lum qildi. Mas’ulga ko’ra, uning o’rniga Turkiyada kichik bir mashg’ulot markazi quriladi. U erda Suriya muxolif guruhlarining rahbarlariga ta’lim beriladi. Bu kichik guruhga AQSh havo amaliyotida nishonga olinadigan nuqtalar qanday belgilanishi borasida ta’lim berilishi rejalashtirilmoqda.
AQSh “harbiy mashg’ulot” dasturi uchun davlat byudjetidan 500 million dollar ajratgan va bir yilda 4500 mo”tadil muxolifat vakili harbiy mashg’ulotdan o’tkazilishi rejalashtirilgan edi. Biroq reja muvaffaqiyatsizlikka uchrab, bor-yo’g’i 54 kishi Suriyaga yuborildi. Ularning ba’zilari Jabhatun Nusra guruhiga asir tushdi, ba’zilari o’ldirildi, ba’zilari esa o’g’irlab ketildi. Xullas AQSh markaziy qo’mondonligining rahbari general Lloyd Ostin “harbiy mashg’ulot”dan o’tgan muxolifatchilarning faqat to’rt-beshtasi qolganligini rasman e’lon qilgan edi.
