Eron prezidenti Hasan Ruhoniy haj asnosida yuz bergan halokat yuzasidan tekshiruv o’tkazish talabini qayta takrorladi. Ruhoniyning bu talabi eronlik 104 nafar hojining jasadi olib kelingan Mehrobod aeroportida tashkil qilingan marosimda yangradi.
“Biz bu hodisa borasida birodarlik va odob tili bilan murojaat qilgan edik. Lozim bo’lgan o’rinda diplomatik til ishga solindi. Agar kerak bo’lsa Eron kuch tilini ham ishga soladi”, dedi Eron prezidenti.
Boshqa bir tarafdan Saudiya Arabistonida nomi oshkor qilinmagan shaxzodalardan biri haj voqeasi ortidan Qirol Salmonga qarshi qo’zg’olon ko’tarishga chaqirmoqda. Saudiya davlatining asoschisi hisoblangan Abdulaziz bin as-Saudiyning nevaralaridan biri ekanligi bildirilgan shaxzodaning qirol oilasiga maktub yo’llab, rahbarlikni topshirishga chaqirganligi aytilmoqda.
Britaniyada chiqadigan “Guardian” gazetasining yozishicha, nomi oshkor qilinmagan shaxzoda qirol Salmon taxtga o’tirgandan buyon hozirgi kungacha qirollikda beqarorlik hukm surayotganini bildirgan.
“Qirol barqaror holatda emas. Aslida qirolning o’g’li mamlakatni boshqarmoqda”, deya shaxzodaning so’zlaridan iqtibos keltiradi gazeta.
Shaxzodaning ma’lum qilishicha, uning amakilari qirol Salmonning o’rniga kim kelishi borasida yig’ilish o’tkazishi kutilmoqda.
“Shu bois to’rt yoki ehtimol beshta amakim yaqin kunlarda maktublarni muhoqama qilish uchun yig’ilish o’tkazishadi. Bir qancha jiyanlari yordamida rejalar tuzishmoqda. Bu eshikni ochishadi. Ikkinchi avlodning bir qanchasi tashvishda qolgan”, deydi shaxzoda.
