Tojikiston mudofaa vazirining sobiq o’rinbosari Abduxalim Nazarzoda bayonotiga ko’ra, Dushanbe va Vahdat shaharlarida IIV xodimlariga qarshi uyushtirilgan qurolli hujumlar Birlashgan tojik muxolifati (BTM)ning sobiq dala qo’mondonlarini ayblash maqsadida hukumat tomonidan amalga oshirilgan.
Tojik muxolifati portali “tajinfo. tj”ning xabar qilishicha, o’tgan juma kuni Dushanbe va Vahdatda sodir etilgan qurolli hujumlarni tashkillashtirishda aybdor sifatida ko’rilayotgan Mudofaa vazirining sobiq o’rinbosari Abduxalim Nazarzoda o’zining hujumlarga aloqasi yo’qligi to’g’risida bayonot bergan. Uning bayonotini “Facebook” ijtimoiy tarmog’iga Nazarzodaning do’stlaridan biri joylashtiran.
Portalning xabar qilishicha, “General o’z vakillari orqali bayonot jo’natgan va uni OAVlari orqali tarqatishni so’ragan”.
“General Nazarzodaning murojaatiga ko’ra, Birlashgan tojik muxolifati qo’mondonlarini ayblash maqsadida hukumatning o’zi bir qancha militsiya bo’linmalariga hujumni tashkillashtirgan. Hukumat bu hujumlar ortidan voqea joyiga allaqachon o’ldirilgan qo’mondonlarning tanalarini tashlab, butun dunyoga ular qurolli to’qnashuv chog’ida yo’q qilinganini e’lon qilishmoqchi bo’lgan. Buni ular faqat Vahdatda uddalagan, chunki u erga hujumni Tojikiston maxsus xizmatlari uyushtirgan”, – deyiladi muxolifat portali xabarida.
Nazarzoda o’z murojaatida ta’kidlashicha, Birlashgan tojik muxolifatining sobiq dala qo’mondonlari Tojikiston Islom uyg’onishi partiyasining yo’q qilishiga qo’shilmagani bois mana shunday qatag’onlarga uchragan.
Avval xabar qilinganidek, o’tgan juma tongida Vahdat shahar ichki ishlar bo’limi va Tojikiston mudofaa vazirligining markaziy apparatiga qurolli hujum uyushtirilgan edi. IIV bu ikki hujum natijasida sakkiz nafar harbiy xizmatchi va to’qqiz jangari xalok bo’lgani haqida xabar qilgan edi. “RIA Novosti” manbalari esa, 33 kishi xalok bo’lgani, ulardan 25 nafari harbiy xizmatchilar ekanligi to’g’risida xabar qilgan edi.
Hukumat mazkur hujumlarga 1997 yil Yarashuv bitimiga muvofiq Qurolli kuchlar tarkibiga kiritilgan hamda muxolifat uchun ajratilgan 30 foizli kvota asosida respublika mudofaa vaziriga o’rinbosar etib tayinlangan general-mayor Abduxalim Nazarzoda rahbarlik qilgani haqida xabar qilgan edi.
