BMTning Suriya masalasi bo’yicha xos vakili Steffan de Mistura Suriya hukumatining da’vatiga javoban Damashqqa jo’nab ketdi. Xabarda aytilishicha, de Mistura Italiyadan Bayrutga etib borishi bilan to’g’ri Damashqqa yo’l olgan.
Mistura Damashqqa etib borishi bilan Suriya tashqi ishlar vaziri Valid Muallim bilash uchrashdi. Muallim Suriya inqirozini siyosiy yo’llar bilan hal qilishda Misturaning tashabbusini qo’llab, Uni Suriyaga taklif qilgan edi. Suriya tashqi ishlar vazirining ta’kidlashicha, Moskva uchrashuvida erishilgan kelishuvlar muhim ahamiyatga ega va Jeneva 3 konferentsiyasining muvaffaqiyati uchun uni amalga oshirish zarurdir.
Suriyaning “Sano” axborot agentligi xabar qilishicha, de Mistura uchrashuv chog’ida Suriya inqirozini siyosiy yo’llar bilan hal qilish borasida Jenevada bo’lib o’tgan oxirgi kelishuvlarni taqdim qilgan.
Hukumatga yaqin bo’lgan “al-Vatan” gazetasining yozishicha, Misturaning ziyorati uch kun davom etadi. Suriya hukumatining rahbari Bashar Asad bilan uchrashuv o’tkazishi ham uning rejalari orasidan o’rin olgan.
BMT xos vakilining so’zchisi Jessi Shaxin Misturaning ziyorati haqida rasmiy bayonot berdi. Uning ma’lum qilishicha, Mistura Suriya rasmiylari bilan uchrashib, ularni 2015 yil 5 mayda boshlangan va iyul oyida yana davom etadigan Jeneva kelishuvlariga rozi qilishga harakat qiladi.
“De Mistura muammoni kuch bilan hal qilish mumkin emasligiga Suriya mas’ullarini qanoatlantirishga bel bog’lagan”, “Suriya hukumati rasmiylari bilan tinch fuqarolarni himoya qilish masalasi ham muhokama qilinadi”, deyiladi bayonotda.
Mistura o’zining avvalgi tashabbusi muvaffaqiyatsizlikka uchragandan so’ng “Jeneva bitimlarini ijro qilish” tashabbusini ko’tarib chiqmoqda. Ma’lumki, Mistura bundan avval “Janglarni muzlatish va tinch aholiga insonparvarlik yordamlarini etkazib berish” tashabbusini olg’a surib chiqqan edi. U Asadga qarshi kurashayotgan va Islomdan boshqasini qabul qilmayotgan jihodiy harakatlarga zarba berib, mavjud jarayonni Amerika foydasiga burish uchun shu rejani ishlab chiqqan edi. Biroq uning chiroyli so’zlar bilan o’ralgan bu tashabbusi og’izdaligicha qolib ketaverdi.
