“Xronika Turkmenistana” nashrining xabar qilishicha, tergov xulosalari bo’yicha Tejonda hibsga olingan odamlar bilan bog’liq bo’lgan musulmonlarni qamoqqa olish davom etmoqda, qo’lga olinganlarning umumiy soni bir yuz ellikka etgan.
Qo’lga olinganlarning barchasi tergov izolyatorlari hamda vaqtinchalik saqlash xibsxonasida ushlab turilipti.
Avvalroq, fevral oyining o’rtalarida Ashxabotdan 200 km uzoqlikda joylashgan Tejon shahrida “noana’naviy” Islomga amal qiluvchi o’nlab musulmonlar qo’lga olingan, Milliy Xavfsizlik xizmati ular afg’on toliblari bilan aloqadorligi va Turkmaniston poytaxtida qator qo’poruvchilik amaliyotlarini sodir etishga tayyorgarlik ko’rishganligini ma’lum qilgan edi.
Xabar qilinishicha, qo’lga olingan 150 kishidan 80 nafari Tejon shahri va unga yaqin qishloqlarda istiqomat qiluvchi musulmonlar, 20ga yaqini poytaxt Ashxobot shahri, qolganlari esa Turkmanistonning boshqa hududlaridan.
“Ayni ish bo’yicha Chogonli shaharchasidan saqol qo’ygan va shaharchadagi uylardan birida joylashgan masjidga doimiy qatnab kelgan 12 nafar (30 yoshga etmagan) yigitlar qo’lga olingan. Hozir mazkur uy ham shaharchadagi boshqa uylar qatori buzib tashlangan. Qo’lga olingan 12 kishidan etti nafari keyinchalik qo’yib yuborilgan, qolgan beshtasi esa tergov hibsxonasida ushlab turilipti”, – deb xabar berdi nashr.
Turkiston:
Turmaniston “mustaqillik”ka erishgan dastlabki kundan betaraflik siyosatini qo’llab har qanday siyosiy va harbiy ittifoqlarga a’zo bo’lishdan o’zini chetga tortib kelgan bo’lsada, ichki siyosatda shaxsga sig’inish siyosatini keng tatbiq qila boshladi. Turkmanistonning brinchi prezidenti Saparmurod Niyozov “qalamiga mansub” “Ruhnoma” kitobi Turkmaniston o’rta va oliy o’quv yurtlarida majburiy o’qitilgan va uni har bir turkmanistonlik sotib olishi, o’qib chiqishi, maktabni bitirish va oliy o’quv yurtlariga kirishda talabalar shu kitob bo’yicha imtihon topshirishlari, odamlar qasam ichgan paytda Qur’on va “Ruhnoma” kitobiga qo’lini qo’yishi, qamoqdan ozod etilayotganlar bu kitobga iymon keltirishi talab qilinar edi. Hatto ish “Turkmanboshi”ni payg’ambar deb atalishigacha borib etdi.
O’z vaqtida Saparmurod Niyozovga nisbatan berilayotgan bunday baholarga qarshi chiqqan turkmanistonlik diniy ulamo Xojaahmad O’rozqlichev tejonliklar bilan uchrashuvda, ommaviy axborot vositalarida Saparmurod Niyozov payg’ambar deb atalayotganligi musulmon e’tiqodlariga zid ekanligini aytadi. Shundan so’ng Turkmaniston hukumati O’rozqlichev tarjimasidagi turkman tilida chop etilgan 40 ming nusxa Qur’onni yoqishga buyruq beradi va unga qarshi tovlamachilik, xizmat vazifasini suiste’mol qilish, pora olish kabi qator ayblovlar bilan jinoiy ish ochiladi.
Bugungi kunga kelib Rossiya hukumati Turkmanistonning betaraflik siyosatidan voz kechishi, KXShT va ShHT singari o’z nufuzi ostida bo’lgan harbiy va siyosiy tashkilotlarga a’zo qilib olib kirishga jiddiy harakat qilmoqda. Rossiya hukumat o’z maqsadiga erishish yo’lida AQSh tomonidan ilgari surilayotgan “islomiy tahdid” kampaniyasidan unumli foydalanib qolmoqchi. Turkmanistonning ko’plab hududlarida fevral oyi o’rtalaridan boshlab musulmonlarga qarshi boshlangan kurash ham aynan 3 fevral kuni Rossiya tashqi ishlar vaziri Sergey Lavrovning Turkmanistonga qilgan safaridan so’ng boshlangani bejiz emas. Mazkur tashrif mobaynida asosiy e’tibor Afg’onistondagi vaziyatni hisobga olgan holda Markaziy Osiyo mintaqasi, shuningdek Yaqin Sharqdagi vaziyatlarga qaratilgan edi.
