Rossiya Bosh harbiy shtabidagi manba ma’lumotiga tayangan holda “Kommersant” nashrining xabar qilishicha, Rossiya yaqin yillar ichida Tojikistonga 70 milliard rubl (1 milliard 230 million dollarga yaqin) hajmidagi harbiy-texnik ko’mak ko’rsatadi. Tojikiston qurolli kuchlarini modernizatsiya qilish bo’yicha kelishuvga 2014 yil yozidida erishilgan bo’lsada ko’rsatiladigan yordam hajmi endi ochiqlandi.
Nashrning ma’lum qilishicha, Tojikiston ko’mak doirasida Kollektiv xavfsizlik to’g’risidagi bitim tashkiloti liniyasi bo’yicha aloqa vositalari, o’qotar qurollar va o’q-dorilardan tortib, aviatsiya, artilleriya va zenit-raketa qurilmalarigacha bo’lgan keng turdagi qurol-yarog’larga ega bo’ladi. Qurollar asosan Rossiya Mudofaa vazirligi qismlaridan kelib tushadi.
Rossiya hukumati Tojikistonga faqatgina qurol-yaroq etkazib berish bilan cheklanmasdan, bu mamlakat hududida joylashgan 201 harbiy bazasidagi harbiylar sonini oshirishga ham qaror qildi. Harbiy baza qo’mondoni Yevgeniy Tubolning so’zlariga ko’ra, keyingi besh yil ichida harbiy xizmatchilar soni 1,5 foizga oshirib, 9 ming kishiga etkaziladi.
“2020 yilgacha harbiy baza shaxsiy tarkibini 9 mingta etkazish rajasi bor”, – dedi Tubol.
Uning so’zlariga ko’ra, ayni vaqtda harbiy bazada 5,9 ming kishi xizmat qilmoqda va mingdan ziyod harbiy texnikalar bor.
Markaziy Osiyoda o’zining harbiy ishtirokini kuchaytirish uchun jiddiy harakat qilayotgan rus hukumati nafaqat Tojikiston, balki Qirg’izistonni ham qurol-yaroq bilan ta’minlab kelmoqda.
“Qirg’iziston rahbariyati taqdim qilgan dasturga muvofiq (harbiy texnikalar etkazib berish) davom etmoqda. Shunday davom etadi”, – dedi KXShT Bosh kotibi Nikolay Bordyuja “K-News” saytiga juma kuni bergan xabarida.
Shu bilan bir qatorda Bosh kotib Qirg’izistonga etkazib berilayotgan qurol-yaroqlar turi va miqdorini oshkor etishni istamadi.
Ma’lumki, 2012 yilda Qirg’izistonga Rossiya tomonidan 1 milliard dollarlik qurol-yaroq etkazib berish bo’yicha shartnoma imzolangan, qurol va harbiy texnikalar etkazib berish 2013 yilning dekabr oyidan boshlangan edi.
