“CA-NEWS” saytining xabar qilishicha, Turkmaniston xukumati Afg’oniston bilan chegara hududi xavfsizligini ta’minlash uchun AQShga harbiy yordam so’rab murojaat qilgan edi.
Amerika mazkur murojaatga asosan yordam ko’rsatishini ma’lum qilgan. Bu haqda AQSh Qurolli kuchlari bosh qo’mondoni Ostin Loyd o’zining Kongressdagi yillik chiqishida bayon qilgan.
“Turkmaniston yaqinda Afg’oniston bilan chegarasini mustahkamlash uchun harbiy vositalar va texnologiyalar bilan yordam ko’rsatishni so’rab murojaat qildi. Va biz imkoniyatlarimizdan kelib chiqib yordam ko’rsatishga tayyorligimizni bildirdik”, – deya ta’kidlagan bosh qo’mondon. Bu haqda TOLO afg’on telekanali xabar bermoqda.
Telekanalning xabariga ko’ra, Turkmanistondan mazkur murojaat “IShID”ning Afg’oniston shimoliy qismlarida ishtiroki aniqlanganidan so’ng kelib tushgan.
Turkmaniston va Afg’oniston o’rtasidagi chegara hududi 209 km.ni tashkil etadi. Chegara hududida Afg’onistonning Faryob, Hirot va Bagdis viloyatlari joylashgan.
Turkmaniston Afg’oniston bilan 14 yil davomida betaraflik siyosatini olib borgan. Ammo AQSh qo’shinlarining afg’on hududidan chiqib ketishi va “IShID”ning faollashuvi ma’lum bo’lgandan so’ng mamlakat o’z xavfsizligi borasida qayg’ura boshlagan.
Turkiston:
Avvalroq Turkmanistonning Afg’oniston bilan chegarasida O’zbekiston chegara naryadi va Rossiya harbiy mutaxassislari paydo bo’lgan va turkman harbiy xizmatchilari chegaraga olib kelinayotgani xabar qilingan edi. Bugunga kelib esa turkman hukumati chegaralarini muxofaza qilish uchun AQShdan harbiy yordam so’ragani ma’lum bo’ldi.
AQSh qurolli kuchlari Markaziy qo’mondonligi boshlig’i general Lloyd Ostin kongress oldida qilgan yillik chiqishida Vashington Ashxabodning bu so’roviga ijobiy javob qaytarishi zarurligini belgilab o’tdi.
“Turkmanistonning betaraflik siyosatini olib borishi harbiy hamkorlik uchun imkoniyatlarimizni sezilarli cheklab keldi. Ammo biz bu so’rovni qo’llab-quvvatlash uchun barcha imkoniyatlarni ishga solamiz”, – dedi general Ostin.
Turkmaniston “mustaqillik”ka erishganidan so’ng betaraflik siyosatini tanlab, har xil siyosiy va harbiy bloklarga qo’shilmaslik pozitsiyasini egallab keldi. Biroq, so’nggi vaqtlarda AQSh tomonidan ilgari surilayotgan “islomiy tahdid” kampaniyasidan Rossiya hukumati Turkmaniston bunday betaraflik siyosatidan voz kechishi, KXShT va ShHT singari o’z nufuzi ostida bo’lgan harbiy va siyosiy tashkilotlarga a’zo qilib olib kirish yo’lida foydalanib qolishga intilmoqda.
Bundan AQSh va Rossiya o’rtasidagi manfaatlar to’qnashuvi Markaziy Osiyo ustida to’qnash kelayotganini xulosa qilish mumkin.
