Turkiyaning bojxona va tijorat vaziri Nuniddin Chanikli parlamentda depudat Sayfiddin Yilmazning tashqi tijorat hajmiga aloqador savollariga javob berdi. Savol asosan 2003 yildan boshlab joriy yilning sentyabr oyiga qadar Turkiya va Isroil o’rtasidagi tijoriy aloqalar xususida bordi. Nuniddin Chaniklining javoblaridan Turkiyaning Isroil bilan tijoriy aloqalari hajmi mazkur davr ichida sezilarli darajada o’sganligi ma’lum bo’ldi.
Deputat Yilmaz parlamentda Turkiyaning bojxona va tijorat vaziriga Turkiya va Isroil o’rtasidagi tijorat hajmi haqida savol berishidan avval Isroil elchisi Shay Koenning bayonotini eslatib o’tdi. Isroil elchisi o’zining bayonotlaridan birida “Ikki davlat o’rtasidagi siyosiy vaziyatga qaramay, tijoriy aloqalar davomli o’sib borayotganiga guvoh bo’lyapmiz. 2014 yilda ikki taraflama tijorat hajmi 5 milliard dollarga etdi. Bu esa ikki davlat o’rtasidagi tijorat hajmining bugungacha etgan eng yuqori ko’rsatgichidir”, degan edi.
Bojxona va tijorat vaziri Nuniddin Chanikli bergan javobga ko’ra, Turkiya 2003 yilda Isroilga 1 milliard 608 million liralik mol eksport qilgan bo’lsa, 2014 yilning sentyabr oyiga kelib Isroilga qilingan eksport hajmi 4 milliard 954 million liragani tashkil qilgan. Shuningdek, Isroildan Turkiyaga import qilingan tovarlar 2003 yilda 687 million 943 ming lirani tashkil qilgan bo’lsa, bu raqam 2014 yilda 4 milliard 776 millionga etgan.
Deputat Sayfiddin Yilmazning ta’kidlashicha, Turkiya hukumati Isroilning Falastin ahliga nisbatan zulmlarini qattiq qoralab, uning sha’niga og’ir gaplarni aytib kelayotganiga qaramay, Turkiya – Isroil o’rtasidagi aloqalar risoladagidek davom etmoqda.
“2011 yilda G’azoga Insoniy yordam olib borayotgan Movi Marmara kemasiga Isroil harbiylari tarafidan uyushtirilgan hujumdan so’ngra Turkiya hukumati har bir bayonotida Isroil bilan aloqalari o’ta taranglashib borayotgani va hech bir sohada aloqa o’rnatmayotligi haqida aytib keldi. Ammo hukumatning Isroil bilan aloqasi o’zi da’vo qilganidek, tarang emasligi muhtaram Chaniklining savollarimizga bergan javoblaridan ma’lum bo’ldi. Bosh vazir bu javoblari bilan ayni paytda Isroil bilan olib borilayotgan tijorat hajmining juda sezilarli darajada o’sganligini rasmiy ravishda tan oldi”, dedi Yilmaz.
