Bugun Qozog’istonda prezident Nursulton Nazarboevning xalqqa kutilmagan murojaati e’lon qilindi. Avvallari bunday murojaat yanvar yoki fevral oyida bo’lar edi.
“Yaqin yillar mamlakatimiz uchun oson kelmaydi, shuning uchun yangi yildan nimalar qilishimiz kerakligini oldindan aytmoqchiman. Bunga vaqt bo’lishi uchun murojaatim yil oxirida e’lon qilinmoqda”, – deya tushuntirdi davlat rahbari. Nazarboev vaqt haqida gapirganda, eng avval hukumatni nazarda tutdi – hukumat 2014 yilning qolgan 50 kuni ichida o’z rejalarini tuzib olishi va 2015 yilda ishlarga zudlik bilan kirishishi lozim.
“Men o’zimning katta tajribamdan sezyapmanki, yaqin yilar dunyo, jumladan, biz uchun ham global sinovlar pallasi bo’ladi. Dunyo arxitekturasi o’zgaradi. Bu murakkab bosqichdan faqatgina kuchli, birlashgan xalqlar va mamlakatlar o’ta oladi”, – deyiladi prezidentning murojaatida.
Nazarboev xalqqa murojaatida Qozog’istonning yangi iqtisodiy siyosati – “Nurli yo’l” haqida e’lon qildi.
Prezidentning ta’kidlashicha, Qozog’iston geosiyosiy tarangliklar markazi yaqinida joylashgan va dunyoda ro’y berayotgan jarayonlarning salbiy ta’sirini his qilmoqda.
“Dunyo bozorlarida narx-navo pasaymoqda, umuman olganda iqtisodiy o’sish sekinlayapti. Ma’lumki, Xalqaro valyuta jamg’armasi va Jahon banki dunyo iqtisodiyoti rivojlanishi to’g’risida 2014 yil va kelgusi ikki yilga oid prognozlarni qayta ko’rib chiqib, avvalgidan past prognozlarni e’lon qildi. Bu bizga ham ta’sir ko’rsatadi. Shuning uchun ayrim pozitsiyalarni qayta ko’rib chiqishimiz, kelgusi davr rejalariga tuzatishlar kiritishimiz kerak. O’ylab o’tirishga vaqtimiz yo’q. Bugun so’z borayotgan rejalar 2015 yilning 1 yanvaridan e’tiboran bajarila boshlanishi kerak. Salbiy tendentsiyalarning oldini olish, xalqning ishonchini oqlash uchun zudlik bilan choralar ko’rishimiz zarur”, – dedi Nazarboev.
Qozog’iston prezidenti 2015, 2016 va 2017 yillarda har yili milliy fond hisobidan respublika byudjetiga 3 milliard dollargacha mablag’ ajratilishini ma’lum qildi. Uch yil ichida avariya holatidagi maktablarni ta’mirlash uchun 70 milliard tenge ($386 mln), maktabgacha ta’lim muassasalarida o’rinlar tanqisligini kamaytirish uchun 20 milliard tenge ($110,5 mln), turar joy-kommunal xo’jaligi infratuzilmasini modernizatsiya qilishga kamida 200 mlrd tenge ($1,1 mlrd), kichik va o’rta biznesga qo’shimcha imtiyozli kreditlar ajratish uchun 100 mlrd tenge ($552 mln) ajratiladi.
