Tojikiston din ishlari, milliy an’ana va marosimlarni tartibga solish qo’mitasi boshlig’i Solihjon Zavqievning xabar qilishicha, Dushanbe shahridagi barcha masjidlar videonazorat kameralari bilan jihozlangan.
Uning so’zlariga ko’ra, butun Tojikiston bo’yicha 365ta Jome’ va markaziy masjidlar bo’lib ularning barchasi videokameralar bilan jihozlangan. Shuningdek Dushanbedagi mavjud 51ta besh vaqt namoz o’qiladigan masjidlarga ham nazorat kameralari o’rnatilgan.
Zavqievning ta’kidlashicha, mamlakatdagi barcha masjidlar kameralar bilan jihozlanadi. “Qishloqlardagi besh vaqt namoz o’qiladigan masjidlarni imkoniyatlari cheklangan, biz xozircha faqat Juma namozi o’qiladigan masjidlargagina kameralar o’rnatganmiz. Ammo yaqin vaqtlarda barcha mahalliy masjidlarni ham kuzatish kameralari bilan jihozlash niyatidamiz”, – dedi Zavqiev.
2012 yili Dushanbe shahar meri Mahmadsaid Uboydullaev, “namozxonlar xavfsizligini ta’minlash” maqsadida Tojikiston poytaxtidagi masjidlarni videonazorat kameralari bilan jihozlash masalasini o’rganib chiqishni topshirgan edi.
Tojikiston OAV esa, “kameralar vositasida ibodatga kelgan namozxonlarni, jumladan noma’lum odamlar tojik xalqiga begona bo’lgan islomiy fikrlarni tarqatishini hamda yosh bolalarni masjidga kelishini nazorat qilish mumkin bo’ladi”, deb hisoblashadi.
Tojikiston qonunchiligiga muvofiq, 18 yoshga etmagan fuqarolar masjidga kelishi ta’qiqlanadi va videonazorat kemaralari ham aynan masjidlarni kirish eshiklari yoniga joylashtirilgan. Masalan, Dushanbedagi Xoji Yaqub nomli markaziy masjidda, kameralar kirish eshiklari yoniga joylashtirilgan va masjidga kim kirayotganini nazorat qilish imkonini beradi.
