Toshkent shahrida 2013 yil 29 noyabr kuni Shanxay hamkorlik tashkilotiga (ShHT) a’zo davlatlar Hukumat rahbarlari kengashining o’n ikkinchi majlisi bo’lib o’tadi.
Unda Qozog’iston Respublikasi Bosh vaziri S.Ahmetov, Xitoy Xalq Respublikasi Davlat kengashi Bosh vaziri Li Ketsyan, Qirg’iziston Respublikasi Bosh vaziri J.Sotiboldiev, Rossiya Federatsiyasi Hukumati Raisi D.Medvedev, Tojikiston Respublikasi Bosh vaziri K.Rasulzoda, O’zbekiston Respublikasi Bosh vaziri Sh.Mirziyoev, ShHT Bosh kotibi D.Mezentsev, ShHT Mintaqaviy aksilterror tuzilmasi Ijroiya qo’mitasi direktori Chjan Sinfen, ShHT Ishbilarmonlar kengashi boshqaruvi va ShHT Banklararo birlashmasi kengashi raislari ishtirok etadilar.
Majlisda ShHTda kuzatuvchi davlatlar vakillari – Afg’oniston Islom Respublikasi ikkinchi vitse-prezidenti M.Haliliy, Hindiston Respublikasi tashqi ishlar vazirining birinchi o’rinbosari S.Singx, Eron Islom Respublikasi sanoat, konlar va savdo vaziri M.Ne’matzoda, Mo’g’uliston Bosh vazirining o’rinbosari D.Terbishdagva, Pokiston Islom Respublikasi Bosh vazirining milliy xavfsizlik va tashqi ishlar bo’yicha maslahatchisi S.Aziz, shuningdek, hamkor xalqaro tashkilotlar vakillari – BMT Bosh kotibi o’rinbosari – BMT ESKATO ijrochi kotibi N.Xeyzer, ASYeAN Bosh kotibi o’rinbosari Nyan Lin, MDH Ijroiya qo’mitasi raisi – ijrochi kotibi S.Lebedev qatnashadi.
Hukumat rahbarlari kengashining majlisi doirasida Qo’shma bayonot va qator boshqa hujjatlar imzolanishi ko’zda tutilmoqda.
Turkiston:
Shanxay hamkorlik tashkiloti 2001 yili Xitoy, Rossiya, Qozog’iston, Tojikiston, Qirg’iziston va O’zbekiston rahbarlari qarori bilan tashkil etilgan bo’lib, bu tashkilotning asosiy vazifasi tashkilotga a’zo davlatlarda xavfsizlik va barqarorlikni ta’minlash, terrorizm, ekstremizm, separatizm va narkotrafikka qarshi kurashdan iborat.
2003 yilning 28-29 may kunlari Moskvada bo’lib o’tgan ShHTning yig’ilishi natijalariga ko’ra Mintaqaviy aksilterror tuzilmasi tashkil etildi. Mazkur yig’ilishda tashkilotga a’zo davlatlar rahbarlari terrorizm va ekstremizmga qarshi kurash bilan bog’liq masalalarni muxokama qilishib, asosiy e’tborni Hizb ut-Tahrir faoliyatiga qaratishdi. Bu yig’ilish bo’lishidan oldin, 2003 yilining 14 fevralida oliy sud qaroriga muvofiq Rossiyada Hizb faoliyati ta’qiqlangan edi.
Kollektiv xavfsizlik shartnomasi tashkiloti (KHShT)dan farqli ravishda, Karimov uchun Shanxay hamkorlik tashkiloti (ShHT)dagi a’zoligi manfaatli bo’lgani uchun O’zbekiston bu tashkilotda o’z a’zoligini saqlab kelmoqda.
Buning sababi, O’zbekiston bu tashkilotda muvofiqlashtiruvchi (koordinator)lik vazifasini bajarib keladi. Bu esa Karimovga mazkur tashkilotga a’zo davlatlar hududlaridan boshpana topgan yoki uni zulmidan qochib bu davlatlarda jon saqlayotgan dunyoviy yoki diniy tashkilotga a’zo bo’lgan shaxslarni hech qanday to’siqlarsiz “ovlab” kelishiga yoki ularni ta’qib qilishlariga keng imkoniyat yaratib beradi.
O’zbekiston maxsus xizmati xodimlarining Rossiya, Qozog’iston va Qirg’iziston hududlarida bemalol izg’ib yurishlarini hamda u erlardan o’zlariga kerak bo’lgan odamlarni har qanday xalqaro qonun va normalarni buzgan holda o’g’irlab kelishib, turli xil sohta ayblovlar bilan ozodlikdan mahrum etishlariga keng imkoniyat berayotgan narsa ham aynan O’zbekistonning mazkur tashkilotga a’zo ekanligini “sharofati”dir. Shuning uchun ham Karimov bu tashkilotdagi a’zoligini to’xtatmay davom ettirib kelmoqda.
