Tojikistonda prezidentlik saylovi tobora yaqinlashib borar ekan amaldagi prezident Imomali Rahmonov Moskvaga yo’l oldi. prezident Rahmonov o’zining Moskva safari haqida jurnalistlarga aytishicha, asosiy masalalardan biri sifatida Tojikistondagi Rossiya harbiy bazasining muddatini uzaytirish ustida muzokaralar olib borilgan.
Ammo kuzatuvchilar bu borada o’zgacha fikrda. Ular Imomali Rahmonov noyabr oyida o’tishi kutilayotgan prezidentlik saylovi oldidan Kremlning dastagini qo’lga kiritish maqsadida Moskvaga borganini aytishmoqda.
Tojikiston muxolifati rahbari Rahmatulloh Zoirovning aytishicha, Rossiya Rahmonovni qo’llab quvvatlash borasida bir qarorga kelmagan.
“Putin avval rozilik bildirib keyin yana orqaga qaytadigan darajada tajribasiz emas. Menga etib kelgan ma’lumotlarga ko’ra Putin “keyin o’ylab ko’ramiz”, deb aytgan”, dedi Zoirov.
Rahmatullo Zoyirov Tojikiston Islomiy uyg’onish partiyasi raisi Muhiddin kabiriyning prezidentlar taqdirini uchinchi davlatlarning poytaxtida hal qilish davri o’tib ketgan, degan fikrini rad qilib, “men bunday deb o’ylamayman, bu davrlar hali o’tgan emas. Rossiya ham, Xitoy ham, bu borada o’z ta’sirini o’tkaza oladi”, deb bildirdi.
Muxolifat rahbarining aytishicha, Tojikistonda Imomali Rahmonov boshqaruvidan noroziliklar kuchli va agar u yana bir marta saylovda o’z nomzodini qo’ysa, bu xalqning sabr kosasini to’ldirib yuborishi mumkin.
“Mening fikrimcha Tojikistondagi vaziyat inqilobga juda yaqin. Odamlar Amaldagi prezident o’zini nomzodigi qo’ymaydi, deb umid qilishmoqda. Agar nomzodini qo’yib, saylov natijalarini buzib ko’rsatadigan bo’lsa, menimcha Tojikistonda inqilob yuz berishi ehtimoli yuqori. Biz inqilob tarafdori emasmiz, ammo odamlarning sabr kosasi to’lib ketsa uni to’xtatish qiyin bo’ladi. Bu kabi hodisalar yuz bergani taqdirda, salbiy oqibatlarni kamaytirish uchun ularda ishtirok etishga majburmiz”, deb aytdi Rahmatullo Zoyirov Bi-bi-si bilan suhbatda.
