Qozogʻistonda “Choʻl burguti” xalqaro harbiy mashgʻulotlar oʻtkazildi
Qozogʻistonda “Choʻl burguti” xalqaro harbiy mashgʻulotlari oʻtkazildi. Bu haqda Qozogʻiston mudofaa vazirligi xabar berdi.
Xabarda aytilishicha, unda Buyuk Britaniya. Hindiston, Qirgʻiziston, Tojikiston, Turkiya, Oʻzbekiston va AQSh harbiylari tinchlikparvar operatsiyalar oʻtkazish amaliyotlarini bajardi.
Xususan, blopostlarda xizmat oʻtash, gumanitar yuklarni kuzatib borish, mahalliy aholi bilan muzokara olib borish, yoʻllarni minalardan tozalash, suvni tozalash va yetkazib berish kabi vazifalar bajarildi.
Izoh:
Rossiya tomonidan Qrimni anneksiya qilinishi ortidan AQSh bir tomondan NATOga aʼzo Yevropa davlatlarini “Rossiya tajovuzidan himoya qilish” va ularni qoʻllab-quvvatlash bahonasi bilan 2015-yildan buyon Yevropa davlatlarida “Atlantik qatʼiyat” deb nomlangan oʻquv mashgʻulotlarini boshlab yubordi. Mazkur oʻquv mashgʻulotlarida Boltiq va Bolqon davlatlari, Polьsha, Chexiya, Vengriya, Ruminiya, Ukraina va Gruziya davlatlari ishtirok etib keladi. AQShning bundan koʻzlangan maqsad imkon qadar Rossiyaning tumshugʻi ostiga kelib olishga intilish boʻlsa, ikkinchi tomondan NATOning Sharqqa tomon kengaytirishga intilmoqda. Shu maqsadda 2003-yildan boshlab Markaziy Osiyo respublikalari bilan hamkorlikda “Choʻl burguti” oʻquv mashgʻulotlarini oʻtkazib kelyapti. Bundan tashqari 2014 yilning 16 may kuni Toshkentda Markaziy Osiyo mamlakatlari bilan aloqa va oʻzaro hamkorlik boʻyicha NATO byurosi ochildi.
Tabiiyki, AQShning bu harakatlari Rossiya uchun istalmagan holat. Shu sababli prezident Putin NATOning oʻz taʼsir maydonini Sharqqa tomon kengaytirmaslik haqidagi avval bergan vaʼdalarini bajarmayotganlikda ayblab keladi. U 2015 yili boʻlib oʻtgan navbatdagi “Choʻl burguti” oʻquv mashgʻulotlaridan soʻng “Biz NATOni borgan sari Rossiya chegaralariga yaqinlashayotganining guvohi boʻlmoqdamiz. Bunda Rossiyaning manfaatlari hisobga olinmayapti”, – degan edi.
Abdurahmon Odilov