Bloomberg: Tramp rus diplomatlarini deportatsiya qilishga tayyorgarlik koʻrmoqda
Britaniya va u bilan hamnafas boʻlgan Yevropa Ittifoqi davlatlari rus diplomatlarini Britaniyadagi sobiq razvedka agenti Sergey Skripalning zaharlanishida ayblab, mamlakatdan quvib yuborayotgani ortidan AQSh prezidenti Donald Tramp ham rus diplomatlarini AQShdan deportatsiya qilishni rejalashtirmoqda. Bu haqida Bloomberg axborot agentligi xabar tarqatdi.
Agentlikning informatsion manbalarga tayanib xabar qilishicha, prezident Tramp Milliy Xavfsizlik Kengashining tavsiyasiga javoban Amerika Qoʻshma Shtatlarida akkreditatsiyadan oʻtgan oʻnlab rus diplomatlarini quvgʻin qilishga tayyorlanmoqda.
Biroq, agentlikning xabariga koʻra, Tramp bu masala boʻyicha yakuniy qaror qabul qilishidan oldin, AQShning Yevropadagi hamkorlari Rossiyaga qarshi xuddi shunday choralar koʻrishga qatʼiy qaror qilganligiga ishonch hosil qilishni istaydi.
Bloomberg axborot agentligi Tramp rus diplomatlarini deportatsiya qilish qarorini dushanba kuni eʼlon qilish mumkinligini taxmin qilmoqda.
Oʻtgan hafta CNN televizion kanali, Amerika Milliy Xavfsizlik Kengashi Dolald Trampga Sergey Skripal ishi boʻyicha bir qator rus diplomatlarini AQShdan deportatsiya qilishni maslahat berganligi haqida xabar tarqatgan edi.