Qozogʻiston ham terrorchilik uchun javobgarlikni kuchaytirdi
Qozogʻiston parlamenti senati (yuqori palata) deputatlari juma kuni “Qozogʻiston respublikasining ekstremizm va terrorchilikka qarshi kurashish boʻyicha bir qator qonunchilik aktlariga oʻzgartish va qoʻshimchalar kiritish toʻgʻrisida”gi qonun loyihasini ikki oʻqishda tasdiqlashdi.
Avvalroq, milliy xavfsizlik qoʻmitasi raisi oʻrinbosari Marat Kolkobayev hujjat “ekstremizm, terrorchilik va qurol-yarogʻ hamda giyohvand moddalarning noqonuniy aylanmasiga qarshi yanada uygʻunlashgan holda kurash olib borish va bu uchun jinoiy hamda maʼmuriy javogarlikni kuchaytirish”ga qaratilgani haqida maʼlum qilgan edi.
Qonun loyihasida ekstremizm va terrorchilik sohasida qonun buzilishlarini amalga oshirganlik uchun javobgarlikni kuchaytirish koʻzda tutilgan.
Shuningdek, qurol-yarogʻ aylanmasi va uni saqlash ustidan ham nazorat oshiriladi. Bundan tashqari, hujjat tezkor-qidiruv faoliyatini olib borayotgan organga aloqa tarmoqlarini taqdim etish, tarmoqlar va aloqa vositalari ishini ular ogʻir va oʻta ogʻir jinoyatlarni sodir etilishiga olib kelishi mumkin boʻlgan holatda toʻxtatib qoʻyish imkonini taqdim etadi.
Qonun loyihasi davlat rahbari tomonidan imzolanishga joʻnatildi.