Afgʻoniston prezidenti qurolli muxolifat bilan tinchlik bitimi imzoladi
Afgʻon mahalliy matbuotining xabar qilishicha, Afgʻoniston prezidenti Ashraf Gʻani payshanba kuni Gulbiddin Hikmatyor boshchiligidagi mamlakatdagi yirik qurolli muxolifat – Afgʻoniston Islom partiyasi bilan tinchlik bitimi imzoladi.
Maʼlum boʻlishicha, qurolli guruh rahbari ayni vaqtda Pokiston hududidaligi taxmin qilinayotgan Hikmatyor mazkur kelishuvni chorshanba kuni imzolagan. Tinchlik kelishuvining dastlabki varianti delegatsiyalar tomonidan 22 sentyabrda Qobuldagi muzokaralarda tasdiqlangan edi.
Yevropa Ittifoqi tashqi siyosat mahkamasi rahbari Federiki Mogerini ushbu kelishuv borasida toʻxtalib, “soʻnggi 15 yilda Afgʻonistonda bugun ilk tinchlik kelishuvi imzolandi. Endilikda tomonlardan uni ijro etish soʻraladi. Bu sabr, oʻzini tiya olishni talab qiladi. Yevropa Ittifoqi Afgʻonistonni ham siyosiy ham moliyaviy jihatdan qoʻllab-quvvatlab qoladi”, – deydi Mogerini.
Hikmatyor boshchilik qilayotgan qurolli guruh mamlakatda “Tolibon” harakatidan keyingi oʻrinda turuvchi katta kuchdir. Guruh rahbari 1993-1994 yillarda Afgʻoniston bosh vaziri lavozimida ishlagan. 2003 yildan AQSh uni oʻsha vaqtdagi Tolibonlar rahbari Mulla Umar, “Al-Qoida” yetakchisi Bin Laden qatoridagi ekstremistlar roʻyxatiga kiritgan. Hozirga qadar Hikmatyorning yashash joyi noʼmalum.