Robia al-Adaviya masjidi hamda Misr davlat universiteti yonida o’tayotgan norozilik namoishlarini tarqatib yuborish amaliyotlari chorshanba kuni tong saharda boshlandi.
U erga armiya va politsiyaning kuchaytirilgan bo’linmalari safarbar qilindi. Maydonlarga hujum vaqtida ular o’q otuv qurollaridan hamda ko’zdan yosh oqizuvchi gazdan foydalanganlar.
“Ustimizdan uchoqlar uchib, mana bunday bombalar tashlamoqda, har tarafdan snayperlar bizni o’qqa tutmoqda”, – deydi masjid yonidagi namoish qatnashchilaridan biri. Halok bo’lganlar maydondan olib chiqib ketilmoqda, yaradolarga esa o’sha erning o’zida tibbiy yordam ko’rsatilmoqda.
To’qnashuvlar nafaqat Qohirada, butun mamlakatda yuz bermoqda. Suvaysh, Al-Mino, Al-Fayyum hamda boshqa viloyatlarda Mursi tarafdorlari bilan unga qarshilar o’rtasidagi to’qnashuvlarda politsiya islomchilarga qarshi harakat olib bormoqda.
Rasmiy ma’lumotlarga ko’ra, mamlakat bo’ylab haloq bo’lganlar soni 150dan ortiq, yaradorlar ikki minga yaqin. “Bu qotilliklar genotsidning o’zidir, – deydi «Musulmon birodarlar» etakchilaridan biri Muhammad al-Baltagi. – Abdul Fattoh as-Sisi harbiy to’ntarish barbod bo’lganini o’zini esa sud kutayotganini yaxshi biladi. Shuning uchun ham u armiya va xalqni grajdanlar urushiga tortmoqchi”.
Qohirada, Iskandariyada shuningdek mamlakatning to’qqiz viloyatida favqulotda holat e’lon qilingan.