AQSh senati Turkiyaga ulьtmatum qoʻydi
Turkiya yo Rossiyani yo Gʻarb mamlakatlarini tanlashi kerak, dedi AQSh senatining qurolli kuchlar qoʻmitasi rahbari Jeyms Inxof. Bu haqida RIA “Novosti” xabar qilmoqda.
“Agar Turkiya F-35 dasturi ichida qolishni istasa, u Rossiyadan S-400 tizimlarini olishdan voz kechishi kerak”, – dedi Inxof Pentagonning Kongress uchun tayyorlangan hisobotiga izoh berarkan.
Inxofning aytishicha, Turkiya AQShning NATO boʻyicha juda muhim hamkoridir. Shu sabab u oʻz maqomiga muvofiq harakat qilishi kerak. “Turkiya yo Rossiyani yo Gʻarbni tanlashi kerak. Agar Turkiya S-400 sotib olishda davom etsa – uni salbiy oqibatlar kutmoqda”- dedi senator.
Nashr shuningdek, AQSh va NATO Turkiyaning S-400 sotib olishidan nega bunchalki tashvishga tushganini ham aytib oʻtgan. Harbiy ekspert Stiven Zalogining fikriga koʻra, Turkiyaga S-400 bilan birga rossiyalik harbiy mutaxassislar ham kelishadi va ular S-400ni amerikaning F-35 samolyotiga qarshi sinab koʻrish imkoniga ega boʻlishi mumkin.
“Rossiyalik harbiy mutaxassislar S-400 radarlarini Turkiyaning F-35 samolyotlariga qarshi sinab koʻrishi mumkin. Bu amerika qiruvchi samolyotining antiradar xususiyatlarini yoʻqqa chiqarishi mumkin”, – deydi ekspert.
Maʼlumki, Turkiya va Rossiya 2017 yilning dekabr oyida umumiy qiymati 2,5 milliard dollar boʻlgan toʻrtta ZRK S-400 divizioni yetkazib berish borasida bitim imzolagan edi. Shartnomaga koʻra, majmuaning birinchi partiyasi 2019 yilning oktyabr oyida yetkazib berilishi kerak.