Rossiya ham 23 nafar Britaniya diplomatini mamlakatdan chiqarib yuboradi
Moskva britaniyalik 23 diplomatni persona non grata deb eʼlon qildi. Ular bir hafta ichida Rossiyani tark etishlari shart. Bu haqda Rossiya Tashqi ishlar vazirligi xabar berdi.
“17 mart shanba kuni Rossiya TIVga Britaniyaning Moskvadagi elchisi Lori Bristou chaqirtirildi va unga Britaniya tomonining igʻvogarona harakatlari hamda Skripalning zaharlanishida asossiz ayblovlariga javob choralari koʻrilishi haqidagi nota topshirildi”,- deyiladi Rossiya TIV matbuot xizmati xabarida.
Bundan tashqari, Rossiya Sankt-Peterburgda Britaniya bosh konsulxonasi ochilishi haqidagi roziligini qaytarib oladi. Shuningdek, maqomi tartibga solinmaganligi bois Britaniya kengashining faoliyati ham toʻxtatiladi.
Vazirlik agarda Britaniya tomoni Rossiyaga nisbatan nodoʻstona tarzdagi harakatlarini davom ettiradigan boʻlsa, Rossiya tomoni yana boshqa javob choralari qoʻllashi mumkinligini bildirdi.
Avvalroq Buyuk Britaniya bosh vaziri Tereza Mey Solsberida razvedka boshqarmasining sobiq polkovnigi Sergey Skripal va uning qizi zaharlangani sababli mamlakatdan Rossiyaning 23 nafar diplomati chiqarib yuborilishini eʼlon qilgandi. Uning soʻzlariga koʻra, Solsberidagi voqeaga “katta ehtimol bilan” Rossiya aloqador.
Rossiyaning Londondagi elchisi Aleksandr Yakovenko mazkur vaziyatni izohlar ekan, rossiyalik diplomatlar Buyuk Britaniyani 20 mart kuni tark etishlarini bildirdi.