Turkiyaning Xitoy uchun qurbonligi
Turkiyada Istanbul politsiya boshqarmasi tomonidan “terrorchi guruh”larga aloqadorlikda ayblanib hibsga olingan 21 muhojir musulmonlar 3 oydan buyon qamoqda qolmoqda. 5 may kuni Istanbul Politsiyasi Zaytunburni tumanida bir vaqtning oʻzida 6 manzilda tintuv oʻtkazib, 21 muhojirni hibsga olgan edi. Ulardan 11 nafari yosh bolalar va 7 nafari ayollardan iboratdir.
Bu amaliyot Turkiya prezidenti Tajab Toyyib Erdogʻanning Xitoyga tashrifi oldidan amalga oshirilganligi eʼtiborga molikdir. Chunki IShIDga qarshi kurash doirasida olib borilgan bu amaliyot siyosiy amaliyot boʻlib, ayni paytda rejasiz va shoshilinch tarzda amalga oshirilgan edi. Hibsga olinganlarning kimligi soʻrab-surishtirilmay, “Sharqiy Turkistonlik”, deya talqin qilindi. Aslida ularning hammasi Sharqiy Turkistonlik emas, balki baʼzilari Tojikiston va Qirgʻiziston fuqarolari boʻlib, ularning Turkiyada vaqtinchalik yashash haqida ruxsatnomasi ham bor edi. Biroq shunga qaramay, barcha mahalliy matbuot vositalari orqali 21 kishining hammasi Sharqiy Turkistonlik noqonuniy qochqinlar, deya eʼlon qilindi.
Bu amaliyot tufayli jamoatchilik orasida – kuchli boʻlmasa ham, biroq samimiy – tanqidlar yuzaga keldi. Zulmga jim qarab turmagan va ularning ozod qilinishi uchun harakat qilgan kishilarga “Bu ishga burningizni tiqmang. Zero bizning ham qoʻlimizdan hech narsa kelmaydi. Chunki bu siyosiy masaladir”, deya javob berildi.
Oradan 3 oy oʻtishiga qaramay bu mazlumlarning taqdiri haligacha nomaʼlumligicha qolmoqda. Ularning, ayniqsa ular orasidagi yosh bolalar va ayollarning terrorchi tashkilotga hech qanday aloqasi yoʻqligi kundek ravshan boʻlsa-da, advokatlarning ular haqidagi talablari rad etilmoqda.
Yaqinda Pekinga safar qilgan Turkiya tashqi ishlar vaziri Mevlut Chavush oʻgʻli Xitoyning xavfsizligini oʻz xavfsizligidek koʻrishini bildirdi.
“Xitoyning xavfsizligini oʻz xavfsizligimizdek koʻramiiz. Xoh Turkiyada boʻlsin, xoh Xitoyda boʻlsin, salbiy faliyatlarga aslo izn bermaymiz”, dedi Chavushoʻgʻli.