Mustamlakachi AQSh va Britaniyaning nufuz talashuvi sababli Yamanda mazhabchilik va mahalliychilik fitnalari alanga oldi. Natijada Yaman xalqining boshiga tushmagan kulfat qolmadi. Ochlik, kasallik, tanqislik, oʻlim, vayronalar, turli jinoyatlar, va hokazo. 20 million kishining hayoti tahlika ostida qolmoqda. Ular asosiy xizmatlardan ham foydalana olishmaydi. Xavfsizlik, oziq-ovqat, taʼlim, sogʻliqni saqlash, suv va elektr kabi asosiy ehtiyojlardan ham mahrum. Bularning barchasi AQSh va Britaniya oʻrtasidagi mojarolar tufayli yuzaga kelmoqda.
Salkam ikki yildan buyon davom etib kelayotgan jang Yamanning moʻrt iqtisodiyoti va infratuzilmasini tor-mor qildi. Xususiy muassasalari, zavodlar va koʻplab ish joylari inqirozga uchradi. Natijada, ishsizlik ortib, deyarli kundalik asosiy ehtiyojlarni qondirish ham mumkin boʻlmay qoldi. 27 millionlik Yaman aholisining 20 millioni yordamga muhtoj. 5 yoshdan kichik bolalar orasida oʻrtacha har oʻn daqiqada bitta bola ochlikdan jon taslim qiladi.
Birlashgan Millatlar Tashkilotining Bolalar jamgʻarmasi (UNICEF) hisobotida keltirilishicha, oldini olish mumkin boʻlgan sabablarga koʻra, oʻtgan yili 63 ming yamanlik vafot etgan. Ularning aksariyati toʻyib ovqatlanmaslik tufayli hayotdan koʻz yumgan.
Jahon oziq-ovqat dasturiga koʻra, qariyb 7,3 million kishi oziq-ovqat yordamiga muhtoj. Ikki milliondan ortiq bolalar va chaqaloqlar toʻyib ovqatlanmaslikdan aziyat chekmoqda. Bu 2015 yilga nisbatan 63% ortiqdir.
Bundan ham yomoni, baʼzi davlatlar va xalqaro tashkilotlardan kelgan yordamlar muhtoj odamlarga yetib bormay, qora bozorlarda sotiladi. Bu esa Yaman xalqining boshiga tushgan azob-uqubatlarni yana-da kuchaytirmoqda.
Yaman aholisining boshiga kelgan bu musibatlar AQShni ham Britaniyani ham aslo qiziqtirmaydi. Ularni faqat oʻz manfaatlarigina qiziqtiradi xolos.