Rossiyada terrorizm bilan sudlanganlarni fuqarolikdan mahrum qilish borasida qonun loyihasi tayyorlandi. “Edinaya Rossiya” (Yagona Rossiya) partiyasining rahbari Vladimir Vasilev, “Spravedlivaya Rossiya” (Adolatli Rossiya) partiyasining rahbari Sergey Mironov, Kommunistik partiyasining rahbari Gennadiy Zyuganov va Liberal-demokratik partiyasining rahbari Vladimir Jirinovskiy tomonidan tayyorlangan ushbu loyiha Rossiya Dumasiga taqdim qilindi.
Mazkur loyihaga koʻra, boshqa davlatlarda tugʻulib, keyinchalik Rossiya fuqaroligini olgan kishilar agar terrorchilik aybi bilan sudlanadigan boʻlsa, Rossiya fuqaroligidan mahrum etiladi. Deputatlar mazkur loyiha ruslar uchun terrorizmga qarshi qoʻshimcha himoya boʻlishini va Rossiya fuqaroligini olgan odamlarning jinoyat qilishini oldini olish uchun foyda berishini olgʻa surishmoqda. Bu qonun loyihasi Qrim tatarlarini ham oʻz ichiga oladi. Chunki ular ham keyinchalik Rossiya fuqaroligiga ega boʻlgan insonlardan hisoblanadi.
Maʼlumki, 2014 yil 26 Fevralda Qrim parlamentining yonida oʻtkazilgan norozilik namoyishlari, Qrimning qoʻgʻirchoq parlamenti aʼzolari oʻtkazayotgan “referendum”ga ovoz berishni kechiktirilishiga sabab boʻlgan edi. Soʻngra bosqinchi rus hukumati “26 fevral ijtimoiy tartibsizliklar” daʼvosini ochdi va nimoyish ishtirokchilarini jinoiy javobgarlikka torta boshladi. Oqibatda bir qancha musulmonlar aybsiz boʻlishlariga qaramay, sudga tortildi.
Rossiya Federal xavfsizlik xizmati (FSB) Rossiyada taʼqiqlangan Hizb ut-Tahrirni bahona qilib, ishgʻol ostidagi Qrimning musulmon xalqiga bosim oʻtkazmoqda. Terrorizm va ekstremizmga qarshi kurash bahonasida xavfsizlik kuchlari uylarga bostirib kirib, noqonuniy tintuv oʻtkazish orqali musulmonlarni hibsga olmoqda.
Ellikdan ortiq mamlakatda faoliyat yuritib kelayotgan Hizb ut-Tahrir bugungi kungacha hech qanday zoʻravonlikka qoʻl urganligi isbotlanmagan boʻlishiga qaramay, Rossiya hukumati uni terroristik tashkilotlar roʻyxatiga kiritib, Hizb aʼzolariga nisbatan repressiya va hibsga olishlarni davom ettirmoqda.
Hozirgi kunda Qrimda Hizb ut-Tahrirga aʼzolik daʼvosi bilan 19 kishi qoʻlga olingan. Bu insonlar siyosiy sabablarga koʻra terrorchilar va ekstremistlar roʻyxatiga kiritilgan. Bundan tashqari, Qrimda quvgʻinga uchragan jurnalist Nikolay Semena, Qrim tatar Milliy majlis raisi oʻrinbosari Ilmi Umerov, Ukraina deputati hamda Qrim tatar Milliy majlis raisi Refat Jubarov, Qrim Fuqarolik koordinatori Lenar Islomov va Qrim tatar viloyat Kengashi aʼzosi Sulayman Qodirov ham oʻsha roʻyxatdan oʻrin olgan.