Rossiya va Oʻzbekiston harbiy-texnik hamkorlikni rivojlantirmoqchi
Rossiya hukumati mamlakat prezidenti Vladimir Putinga Rossiya va Oʻzbekiston oʻrtasida harbiy-texnik hamkorlikni rivojlantirish haqidagi kelishuvni imzolashni taklif qildi.
“Rossiya Federatsiyasi hukumati qaror qiladi: Rossiya mudofaa vazirligi tomonidan taqdim qilingan va Rossiya tashqi ishlar vaziri va ijrochilik hokimiyatining boshqa manfaatdor federal organlari bilan kelishilgan hamda avvaldan Oʻzbekiston bilan koʻrib chiqilgan, Rossiya va Oʻzbekiston oʻrtasida xarbiy-texnik hamkorlikni rivojlantirish haqidagi kelishuv maʼqullansin. Rossiya prezidentiga bu kelishuvni imzolash taklifi berilsin”,- deyiladi Rossiya hukumatining 2016 yil 18 noyabrdagi qarorida.
Kelishuvning maqsadlari harbiy-texnik sohada oʻzaro manfaatli hamkorlikni yanada chuqurlashtirish; qurol va harbiy texnikaning istiqbolli namunalari bilan taʼminlash tizimini takomillashtirish; qurolli kuchlar, harbiy boʻlinmalar, huquq-tartibot muassasalari va maxsus organlarning manfaati yoʻlida harbiy maqsaddagi mahsulotlarni yaratish, ishlab chiqarish, taʼmirlash, modernizatsiya qilish, ularga xizmat koʻrsatish va utillashtirish sohasida ilmiy-texnik va ishlab chiqarish-texnologik salohiyatlarni qoʻllab-quvvatlash; mamlakatning mudofaa qobiliyatini mustahkamlashdan iborat.
Kelishuv harbiy-texnik hamkorlik sohasidagi dasturlarni yaratish, tomonlarning vakolatli idoralari va tashkilotlari oʻrtasida shartnomalar tuzish, harbiy-texnik hamkorlikning aniq masalalari boʻyicha maslahatlashuvlar oʻtkazish va mutaxassislarni taklif qilish bilan amalga oshirilishi mumkin.
Rossiyaning harbiy-texnik hamkorlik boʻyicha federal xizmati va Oʻzbekiston mudofaa vazirligi kelishuvni amalga oshirish boʻyicha vakolatli idoralar etib tayinlandi.
Turkiston:
Rossiya AQShning bir necha marotaba Oʻzbek armiyasini toʻla modrnizatsiya qilish, yaʼni butun harbiy texnikasini tubdan almashtirib yuborish harakatlarini oldini olib qoldi. AQSh hatto Afgʻonistondan chiqib ketayotganidan foydalanib, butun harbiy texnika arsenalini Oʻzbekistonga bepul tashlab ketmoqchi boʻldi. Bu texnikalardan foydalanishni oʻrgatish maqsadida harbiy instruktorlar berib, uzluksiz kerakli harbiy texnik moslamalari bilan taʼminlab turish mexanizmini taklif qildi. Lekin Rossiyaning bir qator bosimlari bilan bu loiha amalga oshmay qolgan edi.
Endi AQSh taklif qilgan amaliyotni Rossiya davom ettirmoqchi boʻlyapti. Yaʼni Oʻzbekiston armiyasining salmoqli qismidagi muddati tugagan harbiy texnikalarini yoʻq qilib, oʻrniga yangi sifatdagi yoki oʻsha eski rusumdagi yangi ishlab chiqilgan harbiy texnika va qurollar bilan taʼminlab olmoqchi boʻlyapti. Bu harakat Rossiya uchun qurol aslaha va harbiy texnika tomondan muhtoj boʻlgan bir mamlakatni oʻz qoʻlida ushlab qolish imkonini beradi. Yaʼni bu mexanizm Oʻzbekistonni yana Rossiyaning harbiy mustamlakasi safida qolayotganidan darak beradi.