Tojikistonda avf eʼlon qilindi, ammo bu dindorlarga taalluqli emas
Tojikistonda amnistiya haqida qaror qabul qilindi. Yangi amnistiya qonuniga koʻra, taxminan 12 ming kishidan baʼzilarining ozod qilinishi, baʼzilarining esa jazolari yengillatilishi kutilmoqda. Ammo yangi qonun oʻz eʼtiqodini mahkam ushlaganligi uchun qamoqqa olinganlarga ijro qilinmaydi.
Tojikiston parlamentining quyi palatasi 24 avgust kuni navbatdan tashqari yigʻilish oʻtkazib, amnistiya haqida qaror qabul qilinganligini eʼlon qildi. Yigʻilishda qaror loyihasini Tojikiston Bosh prokurori Yusuf Rahmon taqdim qildi. Tojikiston prezidenti Imomali Rahmonov Tojikiston mustaqilligining 25 yilligi munosabati bilan amnistiya qarorini oliy majlisga taqdim qilgan edi.
Amnistiyaga tushgan 12 ming mahbusdan 3 mingdan oshiqrogʻi qamoqdan ozod qilinadi, 4 ming kishi turli shaklda afv etiladi, 5 ming kishi ustidan olib borilayotgan tergov jarayoni toʻxtatiladi. Ammo diniy ekstremizmda ayblangan musulmonlar esa amnistiya koʻlamiga kirmaydi.
Amnistiya qonun loyihasi haqidagi rasmiy bayonot 17 avgust kuni Tojikiston Prezidenti veb-saytida eʼlon qilingan edi.
Amnistiya loyihasining birinchi moddasiga binoan ayollar va yosh bolalar, 55 yoshdan oʻtgan erkaklar, birinchi, ikkinchi va uchinchi guruh nogironlari, saraton kasalligiga chalingan bemorlar, yurak kasalligiga chalingan bemorlar, ulugʻ vatan urushi faxriylari, Chernobil faxriylari amnistiya doirasiga kiritiladi. Shuningdek, ehtiyotsizlik tufayli jinoyat sodir qilganlar, maslan yoʻl-transport hodisasi sodir etganlar ham aministiyaga tushadi.
Qotillik, terrorizm va diniy ekstremizmda ayblangan kishilar, konstitutsiyaviy tartibga va davlat xavfsizligiga nisbatan jinoyat sodir etganlar, oʻlim jazosiga va umrbod qamoq jazosiga hukm qilinganlar, bundan avvalgi aministiya tushib ozod qilingandan soʻng takror jinoyatga qoʻl urganlarga mazkur amnistiya ijro qilinmaydi.
Amnistiya qonuni Tojikiston muxolifat vakillarini oʻz ichiga olishi yoki olmasligi haqida maʼlumot berilmadi.