“TASS” axborot agentligining Rossiya havo-kosmik kuchlari qo’mondoni birinchi o’rinbosari Pavl Kurachenkoga tayanib xabar qilishicha, Rossiya Qirg’iziston va Tojikiston bilan qo’shma mintaqaviy havo mudofaa tizimi tashkil etishni rejalashtirmoqda.
“Rossiya Federatsiyasi Qirg’iziston va Tojikiston bilan qo’shma mintaqaviy havo mudofaa tizimini tashkil etish to’g’risidagi bitim loyihasi ishlab chiqilgan va ma’qullanish bosqisida turipti”,- dedi Kurachenko.
Markaziy Osiyo mintaqasida kollektiv xavfsizlikni tashkil etish to’risida so’z yuritgan Kurachenko, 2013 yilda Rossiya va Qozog’iston o’rtasida shunday kelishuv imzolanganini eslatib o’tdi.
Uning so’zlariga ko’ra, ayni vaqtda qo’shma mintaqaviy havo mudofaa tizimiga kiritilgan harbiy boshqaruv organlari vakolati, boshqaruv punktlari, birikma va harbiy qismlarni faoliyatini muvofiqlashtirish bo’yicha ishlar olib borilmoqda.
Turkiston:
Markaziy Osiyo mintaqasidagi davlatlar ustidan siyosiy, saqofiy va iqtisodiy ta’sirini kundan-kunga yo’qotib borayotgan Putin boshchiligidagi Rossiya hukumati asosiy e’tiborini harbiy sohaga qaratmoqda. Mintaqadagi davlatlar, xususan, iqtisodiy va siyosiy nochor bo’lgan Qirg’iziston va Tojikiston uning asosiy nishoni bo’lib kelmoqda. Rossiya mazkur respublikalariga umumiy qiymati 1,5 milliard dollarni tashkil etuvchi harbiy yordam ko’rsatish orqali mintaqadagi harbiy ishtirokini mustahkamlab olgan edi. Endi bo’lsa havo hujumiga qarshi mudofaa tizimini shakllantirish orqali buni yanada kuchaytirib olmoqda.
Putinni Rossiya ichida ham, tashqarisida ham harbiy quvvatga suyanishdan o’zga chorasi qolmadi. Nufuzi ostidagi davlatlarda harbiy ishtirokini kuchaytirish orqali o’z nufuzini saqlab qolmoqchi bo’layotgan bo’lsa, Rossiyaning o’zida oddiy xalqni harbiy vaziyatni kuchaytirish orqali ushlab turishga intilmoqda. Kuni kecha Putin tomonidan tasdiqlangan va bevosita Putinga bo’ysunadigan Milliy gvardiyani tashkil etilishi ham Rossiyada harbiy holatni joriy etish uchun tashlangan navbatdagi qadam bo’ldi. Milliy gvardiyaga keng imkoniyatlar berilib, ommaviy noroziliklarni kuch bilan bostirish, harbiy va maxsus texnikalardan foydalanish salohiyati berildi. Milliy gvardiya hech bir ogohlantirishsiz jismoniy kuch yoki qurol qo’llash huquqiga ham ega bo’ldi.