AQSh vitse-prezidenti Jo Bayden bilan uchrashgan Falastin Prezidenti Mahmud Abbos AQSh hukumati olg’a surayotgan “Ikki davlat” echimini qo’llab quvvatlashini bildirdi. Falastin Prezidenti so’ngi 5 oyda Isroil harbiylari 200 falastinlikni o’ldirganligini tilga olib o’tar ekan, buning sababi yahudiy aholi punktlari qurilishining davom etishi ekanligiga urg’u berdi. Abbosning ta’kidlashicha, “ikki davlat” varianti mintaqada xavfsizlik, tinchlik va barqarorlikka yo’l ochadi.
“1967 yil 4 iyun chegaralariga doir “Ikki davlat” echimi variantiga umidlarning qayta uyg’onishi mintaqada xavfsizlik, tinchlik va barqarorlik yuzaga kelishining kalitidir. Yahudiy aholi punktlari qurilishining davom etishi esa mintaqadagi zo’ravonlik va qon to’kilishiga sabab bo’lmoqda”, “Terrorizmga qarshi qo’lga kiritilgan g’alaba bizdan 1967 yilda belgilangan chegaralarga tobe, poytaxti Sharqiy Quddus bo’lgan mustaqil Falastin davlatini qurishni talab qiladi”, dedi Falastin Prezidenti Mahmud Abbos.
Bundan avval Bayden Isroilga kelgan kuniyoq Isroilning sobiq prezidenti Shimon Peres va Bosh vazir Benyamin Netanyahu bilan uchrashgan edi. Bayden Peres bilan uchrashgandan so’ng jurnalistlar oldida qisqa bayonot berib, AQSh yahudiylar xavfsizligini o’z zimmasiga olishiga ishora qildi.
“Men bu erda ekanligimdan juda mamnunman. Prezident (Barak Obama) salom yo’lladi. Isroil xavfsizligi oxirigacha bizning zimmamizda. Umid qilamanki, ushbu masala bo’yicha kelishuvga erishamiz”, dedi Bayden.
Bayden G’arbiy Quddusda Isroil bosh vaziri Binyamin Netanyahu bilan uchrashgandan so’ng bergan matbuot bayonotida esa “Ochiq aytishga ruxsat bergaysiz, Amerika Qo’shma Shtatlari, bu harakatlarni (falastinliklarning Isroilga qarshi harakatlarini) tanqid qiladi va tanqid qilnmasligini ham qoralaydi”, dedi.
Isroil xavfsizligini qo’llab-quvvatlashda AQShning majburiyati haqida Bayden shunday dedi: “Tarix davomida AQSh boshqaruvi doirasida Isroil xavfsizligini eng ko’p biz qo’llab-quvvatladik. Harbiy hamkorlikdagi yordamlarimiz ilgari misli ko’rilmagan darajaga etdi. Isroil jiddiy tahdidlar qarshisida o’zini himoya qilish uchun etarli kuchga ega bo’lishi borasida sadoqatimizni saqlab qoldik. Juda qiyin va o’zgaruvchan mintaqada joylashgan Isroil xavfsizligi uchun bular juda muhim ahamiyatga egadir. Isroilning yahudiylik va demokratik tuzilmasini himoya qilish uchun yagona yo’l, “Ikki davlat” echimini amalda tatbiq qilishdir. Shuning uchun Amerika Qo’shma Shtatlari har ikki tomonni ham bu borada harakat qilishga chaqiradi”.