AQSh Strategik qo’mondonligining o’tgan yakshanba kuni chiqargan bayonotida Shimoliy Koreyaning uzoq masofali raketani uchirgani ma’lum qilindi. Bayonotga ko’ra, Amerika hukumati shanba kuni kechqurun Qo’shma Shtatlar vaqti bilan soat 18:29 da Shimoliy Koreyaning uzoq masofali raketani uchirganini qayd etgan.
Shimoliy Koreya hukumati bundan bir necha kun avval Yer orbitasida kuzatadigan suniy yo’ldoshni fazoga chiqarish niyati borligini aytib, Qo’shma Shtatlarni xabardor qilgan edi.
Milliy xavfsizlik masalalari bo’yicha AQSh prezidentining maslahatchisi Syuzan Rays xonimning rasmiy bayonotida ta’kidlanishicha, Shimoliy Koreyaning 6 yanvarda yadroviy sinovlar o’tkazishi ortidan tashlagan bu qadami ko’plab Xavfsizlik Kengashi qarorlarini buzish hisoblanib, mintaqa barqarorligiga tahdid soluvchi provokatsion harakatdir.
Rays yana bunday qo’shimcha qildi: «Shimoliy Koreyaning yadroviy va ballistik qurollar dasturi bizning manfaatimizga, shu jumladan, ayrim yaqin ittifoqchilarimiz xavfsizligiga jiddiy tahdid solmoqda, mintaqadagi tinchlik va xavfsizlikka xavf tug’dirmoqda».
Amerika tashqi ishlar vaziri Jon Kerri tomonidan berilgan bayonotda ham uning mamlakati «Xavfsizlik Kengashining ballistik raketalar texnologiyasidan foydalanish bilan bog’liq qarorlarini ochiqdan-ochiq buzish hisoblangan Shimoliy Koreyaning ushbu raketalar sinovi»ni qattiq qoralagani bildirildi. (Onado’li axborot agentligi).
Roya gazetasi sharhi:
Shimoliy Koreyaning yadroviy sinovlar o’tkazish yoki yakshanba kungi ballistik raketalar uchirish kabi bunday amaliyotlarini diqqat bilan kuzatgan kishi, bu narsa Qo’shma Shtatlarni emas, balki Xitoy va Rossiya kabi boshqa davlatlarni tashvishga solayotganining guvohi bo’ladi. Buning boisi shundaki, Amerika Shimoliy Koreya xavfini bartaraf etish, degan narsani va uning ayni amaliyotlarini bahona qilib, Xitoy va Rossiyaga yaqin bo’lgan erlarda bazalarini kengaytirishni va o’z nufuzini mustahkamlab olishni ko’zlayapti. Janubiy Koreyaning «Yonxap» axborot agentligida keltirilgan Xitoy tashqi ishlar vazirligining bayonoti ham buni tasdiqlab turibdi. Gap shundaki, Qo’shma Shtatlar bilan Janubiy Koreya o’rtasida rasmiy so’zlashuvlar o’tkazilgan edi. Unda Shimoliy Koreya tug’dirayotgan tahdidlarga qarshi javob sifatida Amerikaning raketalarga qarshi mudofaa tizimini Janubiy Koreya erlariga joylashtirish haqida mubohasa qilindi. Buning ortidan Xitoy tashqi ishlar vazirligi o’z bayonotida Vashington bilan Seulning bu qaroriga javoban o’zining «qattiq tashvishda» ekanini, «Raketaga qarshi mudofaa tizimi masalasida Xitoy pozitsiyasining aniq va o’zgarmas»ligini bildirdi. Xitoy tashqi ishlar vazirligining ta’kidlashicha: «O’z xavfsizligini ta’minlashni xohlayotgan barcha davlatlar boshqa davlatlarning ham xavfsizlikka oid manfaatlarini hamda mintaqa tinchligi va barqarorligini e’tibordan qochirmasligi shart». Shuningdek, Rossiya pozitsiyasi ham Xitoy pozitsiyasidan o’zgacha bo’lmadi. Masalan, Rossiya tashqi ishlar vazirligi chiqargan bayonotda «Shimoliy Koreyaning raketa uchirishini faqat keskin qoralash bilan qabul qilish lozimligi, bunday xatti-harakatlar ittifoqchilik siyosatini xavf ostiga qo’yuvchilar foydasiga xizmat qilishi, qurolli to’qnashuvlar xavfini yanada oshirib, butun mintaqa, avvalo, Shimoliy Koreya xavfsizligiga ulkan zarar etkazishi» ta’kidlandi. Mana shularning hammasi Qo’shma Shtatlar pozitsiyasini ko’rsatib turibdi. Holbuki, Qo’shma Shtatlar o’zini va ittifoqchilarini himoyasi uchun barcha choralarni ko’rishni zimmasiga olgan hamda u «qaltis harakat ayanchli oqibatlarga olib borishi aniqligini» isbotlashga xalqaro hamjamiyatni chaqirib keladi.
Roya gazetasining 2016 yil 10 fevral chorshanba kungi 64-sonidan