AQSh milliy xavfsizlik agentligi 193 mamlakatda josuslik ishlari olib borish huquqiga ega bo’lgan

 AQSh milliy xavfsizlik agentligining sobiq xodimi Edvard Snouden oshkor qilgan hujjatlarga tayangan holda “Washington Post” nashrining xabar qilishicha, AQSh dunyodagi 193 mamlakatda, shu jumladan O’zbekistonda ham josuslik ma’lumotlarini yig’ish uchun qonuniy huquqqa ega bo’lgan.

 Xabarga ko’ra, milliy xavsizlik agentligi bunday ruxsatnomani 2010 yilda nazorat bo’yicha sud tomonidan olgan. Hujjatda 193 mamlakatlar nomi keltirilgan bo’lib, ular qatorida O’zbekiston ham bor. Mazkur mamlakatlarda AQSh josuslari uchun josuslik faoliyatlarini olib borishlik va josuslar tomonidan foydali deb bilingan barcha ma’lumotlarni yig’ish hamda telefon so’zlashuvlarini eshitishga ruxsat berilgan. Ruxsatnomonda mazkur mamlakatlar AQSh maxsus kuchlarida “qonuniy” qiziqish keltirib chiqarishi mumkinligi ko’rsatib o’tilgan.

 Amaldagi xalqaro kelishuvlarga ko’ra AQSh faqat to’rt davlat – Buyuk Britaniya, Kanada, Avstraliya va Yangi Zelandiyaga nisbatan josuslik ishlarini olib bormaydi.

 AQSh milliy xavfsizlik agentligi (MXA)da Jaxon banki, Xalqaro valyuta fondi, Yevropa ittifoqi va xalqaro atom energetika tashkiloti (MAGATE)larni kuzatishga ruxsatnoma mavjud. Xabarga ko’ra, mazkur tashkilotlarni kuzatish uchun MXAda qonuniy ruxsatnoma bo’lsada, bu huquqdan ular har doim ham foydalanishmagan.